რუსთავში სამი შვილის დედას სესხის დავალიანების გამო სახლიდან ასახლებენ

რუსთავში სამ შვილთან ერთად მცხოვრებ მარტოხელა დედას 2015 წელს აღებულ სესხთან დაკავშირებით ბინიდან გამოსახლების საფრთხე ემუქრება. 24News.ge-იუწყება რომ, მესხიშვილის ქუჩაზე მდებარე ბინა აუქციონის გზით გაიყიდა. ახალი მფლობელი კი საცხოვრებელი ფართის დაცლას ითხოვს. ადგილზე სააღსრულებო პოლიციის თანამშრომლები არიან მობილიზებული. უმუშევარმა ქალმა განაცხადა, რომ წასასვლელი სხვა ადგილი არ აქვს და ბინის დატოვებას არ აპირებს. „ეს საქმე 2015 წლიდან გრძელდება. ჩემმა დედამთილმა და მეუღლემ ბინა ბანკში იპოთეკით დატვირთეს. მე კი ამის შესახებ ნამდვილად არაფერი ვიცოდი. სამი შვილის მარტოხელა დედა ვარ. ჩემს შვილს 14 წელი აქვს. ასე სასტიკად ქუჩაში მაგდებენ. ნამდვილად, წასასვლელი არსად მაქვს. სახლიდან არ გავალ, იქ სიკვდილი თუ მომიწევს, იქვე მოვკვდები“, – განაცხადა ეკა მაღალაშვილმა. მარტოხელა დედას სურს, რომ ახალი მფლობელისგან ბინის დასაბრუნებლად მას დრო და გარკვეული პირობები მიეცეს. ამჟამად მხარეებს შორის ამ საკითხთან დაკავშირებით მოლაპარაკებები მიმდინარეობს. არსებული ინფორმაციით, თუ შეთანხმება ვერ შედგა, სააღსრულებო ბიუროს თანამშრომლებს ოჯახის ბინიდან გამოსახლების განხორციელება მოუწევთ.

www.24news.ge

რუსთავში სამი შვილის დედას სესხის დავალიანების გამო სახლიდან ასახლებენ

სხვა სიახლეები