საქართველოში საერთაშორისო სნაიპერის კურსი ჩატარდა

საქართველოს თავდაცვის ძალების სპეციალური ოპერაციების სარდლობამ საერთაშორისო სნაიპერის კურსი ჩაატარა. 24News.ge იუწყება, რომ კურსის ფარგლებში საქართველოს, რუმინეთისა და პოლონეთის სპეციალური ოპერაციების ძალების წარმომადგენლები ქართველმა ინსტრუქტორებმა მოამზადეს. ორი კვირის განმავლობაში კურსის მონაწილეებმა რთულ რელიეფურ პირობებში სხვადასხვა დისტანციიდან სროლის წვრთნები გაიარეს და შორ მანძილზე სროლის უნარები გაიუმჯობესეს. წვრთნების დასკვნითი ეტაპი მუხროვანის პოლიგონზე ჩატარდა. აქ მონაწილეებმა სნაიპერული შაშხანებიდან სხვადასხვა მანძილზე ისროლეს. საერთაშორისო სნაიპერის კურსის დასრულებისადმი მიძღვნილი ცერემონია მუხროვანში, მაიორ გელა ჭედიას სახელობის სპეციალური ოპერაციების სარდლობის ბაზაზე გაიმართა. ღონისძიებას საქართველოს თავდაცვის ძალების სპეციალური ოპერაციების სარდალი, პოლკოვნიკი თეიმურაზ ღლატეიშვილი, სარდლობის წარმომადგენლები და ნატო-საქართველოს არსებითი პაკეტის (SNGP) ოფიციალური პირები ესწრებოდნენ. კურსის წარმატებით დასრულების შემდეგ მონაწილეებს შესაბამისი სერტიფიკატები და სამკერდე ნიშნები გადაეცათ. თავდაცვის სამინისტროს ინფორმაციით, საერთაშორისო სნაიპერის კურსის მთავარი მიზანია პარტნიორ ქვეყნებთან თანამშრომლობის გაღრმავება, ურთიერთთავსებადობის დონის ამაღლება და საერთაშორისო გამოცდილების გაზიარება.

www.24news.ge

საქართველოში საერთაშორისო სნაიპერის კურსი ჩატარდა

სხვა სიახლეები