საქართველოში უმაღლეს და პროფესიულ განათლებაში მეორადი ჩარიცხვის შედეგები გამოქვეყნდა

შეფასებისა და გამოცდების ეროვნული ცენტრი უმაღლეს და პროფესიულ საგანმანათლებლო დაწესებულებებში მიღების „მეორადი ჩარიცხვის“ შედეგებს აქვეყნებს. 24News.ge იუწყება, რომ ცენტრის ცნობით, აბიტურიენტებს საკუთარი შედეგების შემოწმება შეუძლიათ უწყების მიერ გამოქვეყნებულ ცხრილში, საგამოცდო ფურცელზე მითითებული 9 ნიშნა საიდენტიფიკაციო კოდის საშუალებით. მონაცემების თანახმად, „მეორადი ჩარიცხვის“ პროცესში მონაწილეობის უფლება 4 010 აბიტურიენტს მიეცა. მათგან 1 715 აბიტურიენტმა გაიარა რეგისტრაცია. შედეგების მიხედვით, 1 242 აბიტურიენტმა უმაღლეს და პროფესიულ საგანმანათლებლო დაწესებულებებში სწავლის უფლება მოიპოვა. ეს პროცესში მონაწილეთა საერთო რაოდენობის 73 პროცენტს შეადგენს. ბაკალავრიატის საფეხურზე 818 აბიტურიენტი ისწავლის. მათგან 312 აბიტურიენტი სახელმწიფოს მიერ დაფუძნებულ უმაღლეს საგანმანათლებლო დაწესებულებებში, ხოლო 506 აბიტურიენტი კერძო უმაღლეს საგანმანათლებლო დაწესებულებებში ჩაირიცხა. პროფესიული განათლების პროგრამებზე სწავლის უფლება 408-მა აბიტურიენტმა მოიპოვა. მათგან 244 აბიტურიენტი სახელმწიფო, ხოლო 164 აბიტურიენტი კერძო პროფესიულ საგანმანათლებლო დაწესებულებებში ჩაირიცხა. გარდა ამისა, 16-მა ადამიანმა ქართული ენის მომზადების პროგრამაზე სწავლის უფლება მოიპოვა. ყველა მათგანი სახელმწიფოს მიერ დაფუძნებულ უმაღლეს საგანმანათლებლო დაწესებულებებში ჩაირიცხა. აღსანიშნავია, რომ „მეორად ჩარიცხვაში“ მონაწილეობის მიღება შეეძლოთ იმ აბიტურიენტებს, რომლებმაც 2026 წლის ერთიან ეროვნულ გამოცდებზე თითოეულ საგანში განსაზღვრული კომპეტენციის მინიმალური ზღვარი გადალახეს, თუმცა ჩარიცხვის უფლება ვერ მოიპოვეს. ასევე ერთიან ეროვნულ გამოცდებზე ცალკეულ საგნებში განსაზღვრული კომპეტენციის მინიმალური ზღვრის ვერ გადალახვის, თუმცა პროფესიული განათლების პროგრამებისთვის განსაზღვრული კომპეტენციის მინიმალური ზღვრის გადალახვის შემთხვევაში, პირებსაც მიეცათ მეორად ჩარიცხვაში მონაწილეობის უფლება.

www.24news.ge

საქართველოში უმაღლეს და პროფესიულ განათლებაში მეორადი ჩარიცხვის შედეგები გამოქვეყნდა

სხვა სიახლეები