Nyu-Yorkda Gürcüstanın xarici işlər nazirini mühacirlər etirazla qarşılayıb (VİDEO)

Nyu-Yorkda Gürcüstanın xarici işlər naziri Maka Boçorişvili və nazirliyin digər nümayəndələri gürcü mühacirlərin etirazı ilə qarşılaşıb. 24News.ge xəbər verir ki, məlumata görə, mühacirlər Maka Boçorişvili, onun müavini Laşa Darsalia və Gürcüstanın BMT yanında daimi nümayəndəsi David Bakradzenin getdiyi restoranın qarşısında toplaşıblar. Etiraz iştirakçılarından biri Maka Boçorişviliyə müraciət edərək, “Boçorişvili gəldi, xanım Boçorişvili. Sizin heç utanmağınız yoxdur? Hansı hökumətə xidmət edirsiniz?” – deyə bildirib. Mühacirlər Gürcüstan Xarici İşlər Nazirliyinin digər nümayəndələrinə də müraciət edərək ölkəni tərk etmələrinin səbəblərindən danışıblar. Onlar başqa ölkələrdə ailələrini dolandırmaq üçün çalışdıqlarını bildiriblər. Xarici İşlər Nazirliyinin əməkdaşı Arçil Qaraulaşvili isə etirazçılardan birinə cavab olaraq, “Gürcüstanda da iş yerləri var. Məni təhsilim və əməyim işlə təmin edib”, – deyib. Etirazçılardan biri isə ona belə cavab verib: “Burada gördüyünüz insanların hamısının ali təhsili var. Amma məcburuq... Sizin hökumətinizin siyasəti səbəbindən bura gəlmişik və başqalarına qulluq edirik!” Arçil Qaraulaşvili həmçinin gürcülərin ölkədən mühacirət etməsindən təəssüfləndiyini bildirib. “Mən gürcülərin xaricə getdiyini görəndə ürəyim ağrıyır”, – deyə o qeyd edib. Qeyd edək ki, Gürcüstan hakimiyyətinin nümayəndə heyəti hazırda ABŞ-da səfərdədir. Baş nazir İrakli Kobaxidze BMT Baş Assambleyasının 81-ci sessiyasında iştirak edir. Nümayəndə heyətinin tərkibində Baş nazirin müavini, xarici işlər naziri Maka Boçorişvili və Hökumət Administrasiyasının rəhbəri Levan Jorjoliani də yer alır.

www.24news.ge

Nyu-Yorkda Gürcüstanın xarici işlər nazirini mühacirlər etirazla qarşılayıb (VİDEO)

Digər xəbərlər