Qardabanidə 2,64 milyon lari dəyərində torpağı saxtakarlıqla ələ keçirməyə cəhd edilib - Saxlanılanlar var

Prokurorluq təşkilatlanmış qrup tərəfindən 2 milyon 640 min lari dəyərində torpaq sahəsinin saxtakarlıq yolu ilə ələ keçirilməsi və qanunsuz gəlirin leqallaşdırılmasına cəhdlə bağlı bir nəfəri saxlayıb. 24News.ge xəbər verir ki, bu barədə Prokurorluq məlumat yayıb. Prokurorluğun məlumatına görə, saxlanılan şəxs əvvəllər dələduzluğa görə üç dəfə məhkum olunub. O, digər şəxslərlə birlikdə Qardabani bələdiyyəsinin Qamarcveba kəndində xarici ölkə vətəndaşına məxsus, 2 milyon 640 min lari dəyərində torpaq sahəsini qanunsuz yolla ələ keçirmək məqsədilə cinayətkar qrup yaradıb. İstintaqın versiyasına görə, qrup üzvləri 2026-cı ilin may ayında notariusa Yunanıstanda verildiyi iddia olunan saxta etibarnamə təqdim ediblər. Sənəddə zərərçəkmiş şəxsin təqsirləndirilən şəxslərdən birinə torpaq sahəsi ilə bağlı, o cümlədən əmlaka sərəncam vermək hüququ olmaqla, tam nümayəndəlik səlahiyyəti verdiyi göstərilib. Saxta etibarnamədən istifadə edən şəxslər alqı-satqı müqaviləsi rəsmiləşdirərək notariusu və qeydiyyat orqanını aldadıblar və torpaq sahəsini sürətləndirilmiş qaydada qrup üzvlərindən birinin adına qeydiyyatdan keçiriblər. Daha sonra cinayət yolu ilə əldə edilmiş əmlaka qanuni görüntü vermək və xüsusilə böyük məbləğdə qanunsuz gəliri leqallaşdırmaq məqsədilə Dövlət Reyestrinin Milli Agentliyinə saxta alqı-satqı müqaviləsi təqdim edilib. Həmin sənədə əsasən, torpaq sahəsinin mülkiyyət hüququnun qrupun digər üzvünün adına keçirilməsi nəzərdə tutulub. Lakin istintaq tərəfindən verilən məlumat əsasında qeydiyyat orqanı prosesini dayandırıb və bununla da təqsirləndirilən şəxslər planlarını tam həyata keçirə bilməyiblər. Saxlanılan şəxsə Cinayət Məcəlləsinin dələduzluq və qanunsuz gəlirin leqallaşdırılmasına cəhdlə bağlı maddələri üzrə ittiham irəli sürülüb. Bu maddələr üzrə 12 ilədək azadlıqdan məhrumetmə cəzası nəzərdə tutulur. Cinayət işi üzrə istintaq təşkilatlanmış qrupun digər üzvlərinin müəyyənləşdirilməsi məqsədilə davam etdirilir. Prokurorluq xatırladıb ki, eyni fakt üzrə əvvəllər də 6 nəfər saxlanılıb və onların barəsində həbs qətimkan tədbiri seçilib.

www.24news.ge

Qardabanidə 2,64 milyon lari dəyərində torpağı saxtakarlıqla ələ keçirməyə cəhd edilib - Saxlanılanlar var

Digər xəbərlər