ჯამდელიანი სასამართლოს გადაწყვეტილებას გამოეხმაურა: დიდი ხანია ამ ქვეყანაში სამართალს კრიზისი უდგას

ქვემო ქართლის ყოფილმა ვიცე-გუბერნატორმა გიორგი შინჯიკაშვილმა მარნეულისა და ჰუჯაბის ეპისკოპოს გიორგი ჯამდელიანის წინააღმდეგ პატივისა და ღირსების დაცვის საქმეზე შეტანილი სასამართლო დავა მოიგო. 24News.ge იუწყება, რომ საქმეს ბოლნისის რაიონულმა სასამართლომ განიხილა. სასამართლოს გადაწყვეტილების შემდეგ ეპისკოპოსმა გიორგი ჯამდელიანმა სოციალურ ქსელში განცხადება გაავრცელა და სასამართლოს გადაწყვეტილება გააკრიტიკა. მან პოსტი წმინდა წერილიდან ციტატებით დაიწყო: “ვაი,უსამართლო განაჩენის გამომტანთ და უკანონო მსჯავრმდებელთ”(ისაია.თავი X.1.) “ვაი მათ,ვინც ბოროტებას სიკეთეს არქმევს და სიკეთეს-ბოროტებას.ვინც ბნელს ნათლად სახავს და ნათელს-ბნელად.”(ისაია.თავიV.20) ეპისკოპოსის განცხადებით, აღნიშნული საქმე სამოქალაქო ხასიათისაა და არ ეხება სისხლის სამართლის საქმის არსებით განხილვას. მისი თქმით, სასამართლომ გადაწყვეტილება მხოლოდ უდანაშაულობის პრეზუმფციის საფუძველზე მიიღო და დანაშაულის მომზადების ფაქტთან დაკავშირებით სამართლებრივი შეფასება არ გაუკეთებია. გიორგი ჯამდელიანის განცხადებით, სასამართლოს გადაწყვეტილების „აღდგენილ სამართლიანობად“ შეფასება ნაადრევია. მისივე თქმით, ეს არის მისი ბოლო საჯარო განცხადება აღნიშნულ საკითხთან დაკავშირებით. “ვაი,უსამართლო განაჩენის გამომტანთ და უკანონო მსჯავრმდებელთ”(ისაია.თავი X.1.) “ვაი მათ,ვინც ბოროტებას სიკეთეს არქმევს და სიკეთეს-ბოროტებას.ვინც ბნელს ნათლად სახავს და ნათელს-ბნელად.”(ისაია.თავიV.20) მსურს გამოვეხმაურო ბოლნისის რაიონული სასამართლოს მიერ დღეს მიღებულ გადაწყვეტილებას და ოდნავი სიცხადე შევძინო მას. დიდი ხანია ამ ქვეყანაში სამართალს კრიზისი უდგას და ამის კიდევ ერთი ნათელი დადასტურებაა სასამართლოს დღევანდელი გადაწყვეტილება. მიუხედავად იმისა,რომ მე როგორც მღვდელმთავარი ვმოქმედებდი საეკლესიო სამართლის კანონიკური ნორმების დაცვით,მოსამართლემ უგულებელყო მართლმადიდებელი ეკლესიის დოქტრინა.არ გაითვალისწინა,რომ ვმოქმედებდი საეკლესიო სამართლით ჩემთვის მონიჭებული უფლებამოსილების ფარგლებში და ჩემს ხელთ არსებულ მტკიცებულებებზე დაყრდნობით.პიროვნების ვინაობა არ გაჟღერებულა არც ამბიონიდან,არც საეკლესიო სასამართლოს მიერ მიღებულ განჩნებაში. აღნიშნული გადაწყვეტილების ინტერპრეტირება ისე,თითქოს სამართალი აღსრულდა და სამართალმა გაიმარჯვა,გახლავთ საზოგადოების შეცდომაში შეყვანის უსუსური მცდელობა. აღნიშნული საქმე გახლავთ სამოქალაქო საქმეების კატეგორია და მას კავშირი არ აქვს სისხლის სამართლის დანაშაულის განხილვასთან. ეს პროცესი ჯერ კიდევ წინაა! რაც შეეხება აღნიშნულ შემთხვევას, მოსამართლემ იმსჯელა და დაადგინა, რომ რადგან ჯერ პირის მიმართ არ დამდგარა სასამართლოს განაჩენი სისხლის სამართლებრივ საქმეზე, შესაბამისად მის მიმართ გაჟღერებული ყველა ბრალდება უკანონოა უდანაშაულობის პრეზუმფციის გათვალისწინებით. ბოლნისის რაიონულ სასამართლოს არ უმსჯელია იმაზე, ჰქონდა თუ არა დანაშაულის მომზადებას ადგილი, რადგან მას ამის უფლებამოსილება არც აქვს. ეს გახლავთ ამ საქმის ფორმალური და კანონიერი მხარე. შესაბამისად, ატეხილი აჟიოტაჟი, ყიჟინა და აღდგენილ სამართალზე საუბარი უადგილო, სასაცილო და ნაადრევია. ეს გახლავთ ჩემი პოზიცია და ბოლო კომენტარი ამ საკითხთან დაკავშირებით და ამ მასკარადში მონაწილეობას არ ვაპირებ."

www.24news.ge

ჯამდელიანი სასამართლოს გადაწყვეტილებას გამოეხმაურა: დიდი ხანია ამ ქვეყანაში სამართალს კრიზისი უდგას

სხვა სიახლეები