"Ozan Saz" televiziya müsabiqəsinin qaliblərinin mükafatlandırılması mərasimi keçirilib (VİDEO)

Borçalı aşıq sənətinin qorunması, yaşadılması və gələcək nəsillərə sevdirilməsi məqsədilə 24News Media tərəfindən təşkil olunan "Ozan Saz" televiziya müsabiqəsinin qaliblərinin mükafatlandırılması mərasimi keçirilib. 24News.ge xəbər verir ki, tədbir Marneuli bələdiyyəsinin Kəpənəkçi kəndində yerləşən Ustad Aşıq Kamandar Əfəndiyevin Ev Muzeyinin həyətində baş tutub. Mərasimdə Azərbaycan Respublikasının Gürcüstandakı Səfirliyinin nümayəndəsi Cavid Məhərrəmov, Türkiyənin Gürcüstandakı Səfirliyinin təhsil müşaviri Yüksel Kara, Marneuli Bələdiyyə Məclisinin sədri Amiran Giorgadze, Gürcüstan Ombudsman Aparatının regional departamentinin rəhbəri Giorgi Talakvadze, Gürcüstan Müsəlmanları İdarəsinin müftisi Hacı Etibar Eminov, Türkiyənin Gürcüstandakı Səfirliyinin Dini İşlər üzrə müşaviri Mahmud Göl, Marneuli meriyasının və bələdiyyə məclisinin struktur bölmələrinin rəhbərləri və əməkdaşları, müsabiqə iştirakçıları, münsiflər heyətinin üzvləri, mədəniyyət xadimləri, media nümayəndələri, ziyalılar və gənclər iştirak ediblər. Elminaz Osmanovanın aparıcılığı ilə keçirilən tədbirdə açılış nitqi ilə çıxış edən 24News Medianın rəhbəri və “Ozan Saz” televiziya müsabiqəsinin layihə rəhbəri Azər Məmmədov layihənin məqsəd və əhəmiyyətindən danışıb. O bildirib ki, müsabiqənin əsas məqsədi Borçalı aşıq sənətinin zəngin ənənələrini qorumaq, yaşatmaq və gələcək nəsillərə ötürmək, bu qədim sənəti gənclər arasında təbliğ etmək, yeni istedadları üzə çıxarmaq, eləcə də milli-mənəvi dəyərlərin yaşadılmasına və inkişafına töhfə verməkdir. Azər Məmmədov çıxışında layihənin ərsəyə gəlməsində dəstək göstərən qurum və şəxslərə də təşəkkürünü ifadə edib. O, layihəyə göstərdiyi dəstəyə görə Azərbaycan Respublikasının Diasporla İş üzrə Dövlət Komitəsinə, çəkilişlərin həyata keçirilməsi üçün yaradılan şəraitə görə "Azərbaycan Evi"nə, həmçinin müsabiqənin peşəkar şəkildə keçirilməsi üçün böyük zəhmət göstərən münsiflər heyətinə xüsusi minnətdarlığını bildirib. Daha sonra çıxış edən rəsmi şəxslər, ziyalılar və qonaqlar "Ozan Saz" televiziya müsabiqəsini yüksək qiymətləndirərək layihənin Borçalı aşıq sənətinin qorunması, yaşadılması və gələcək nəsillərə ötürülməsi baxımından mühüm əhəmiyyət daşıdığını vurğulayıblar. Çıxışlarda qeyd olunub ki, müsabiqə qədim aşıq sənətinin daha geniş auditoriyaya tanıdılmasına, gənc istedadların üzə çıxarılmasına və milli-mədəni irsin təbliğinə mühüm töhfə verir. Tədbirin davamında müsabiqənin qaliblərinin və iştirakçılarının mükafatlandırılması mərasimi keçirilib. Münsiflər heyətinin qərarına əsasən, I yerə layiq görülən Nurlan Xansultanlıya noutbuk və diplom, II yerin sahibi Əli Əsgərova mobil telefon və diplom, III yerə layiq görülən Mahal Qocayevə isə planşet və diplom təqdim olunub. Müsabiqənin digər bütün iştirakçıları da fəal iştiraklarına görə sertifikatlarla təltif ediliblər. Tədbir ustad aşıq Həvəskar Qurbanov və onun şəyirdlərinin, eləcə də müsabiqə qaliblərinin təqdim etdikləri aşıq havaları ilə davam edib.

www.24news.ge

"Ozan Saz" televiziya müsabiqəsinin qaliblərinin mükafatlandırılması mərasimi keçirilib (VİDEO)

Digər xəbərlər