Marneuli Meriyası tələbələrin gediş haqqı ilə bağlı dəstəyin şərtlərini açıqlayıb

Marneuli Munisipalitetinin meri Daur İsmayılovun təşəbbüsü ilə bələdiyyədə qeydiyyatda olan müxtəlif kateqoriyalı tələbələr üçün aylıq gediş xərclərinin maliyyələşdirilməsi 50 laridən 100 lariyə qaldırılıb. 24News.ge xəbər verir ki, artırılmış maliyyə dəstəyi sosial müdafiəyə ehtiyacı olan, xüsusi qayğıya ehtiyacı olan, məcburi köçkün statusuna malik, çoxuşaqlı ailələrin üzvü olan, ailəsində ən azı üç tələbə təhsil alan, veteran övladı olan və valideynlərini itirmiş tələbələrə şamil ediləcək. Bildirilib ki, qeyd olunan kateqoriyalara aid tələbələr bu dəstəyi ali təhsilin birinci kursunun birinci semestrindən etibarən ala biləcəklər. Eyni zamanda, yüksək akademik göstəricilərə malik tələbələr də artırılmış gediş xərclərinin maliyyələşdirilməsindən yararlanacaqlar. Bu dəstək bütün fənlər üzrə ən azı 91 bal toplayan tələbələrə, eləcə də pedaqoji ixtisaslar – ibtidai sinif müəllimliyi, gürcü dili və ədəbiyyatı, biologiya, kimya, fizika, tarix və riyaziyyat istiqamətlərində təhsil alan və müvafiq akademik göstəricilərə malik tələbələrə şamil olunacaq. Bu kateqoriyaya aid tələbələr maliyyə dəstəyini almaq üçün Marneuli Meriyasına akademik göstəricilərini təsdiq edən qiymət cədvəlini təqdim etməlidirlər. Meriyanın məlumatına görə, proqramdan yalnız müraciət etməzdən əvvəl son bir il ərzində Marneuli Munisipalitetində qeydiyyatda olan və fasiləsiz yaşayan tələbələr yararlana biləcəklər. Qeyd olunub ki, bu tələbdən istisna yalnız qaçqınlıq statusunu təsdiq edən sənədə əsasən qeydiyyat ünvanı Marneuli Munisipaliteti olan məcburi köçkün statuslu şəxslərə şamil edilir.

www.24news.ge

Marneuli Meriyası tələbələrin gediş haqqı ilə bağlı dəstəyin şərtlərini açıqlayıb

Digər xəbərlər