TƏCİLİ: Xüsusi əməliyyat keçirilib, 29 nəfər saxlanılıb (VİDEO)

Daxili İşlər Nazirliyinin Mərkəzi Kriminal Polis Departamentinin əməkdaşları Baş Prokurorluqla birgə son 24 saat ərzində ölkə üzrə həyata keçirilən genişmiqyaslı əməliyyat-axtarış və istintaq tədbirləri nəticəsində məhkəmə qərarı əsasında “qanuni oğru” aləmi ilə əlaqədə olmaqda şübhəli bilinən 29 nəfəri saxlayıblar. 24News.ge xəbər verir ki, daha 3 nəfərə qiyabi ittiham irəli sürüləcək. Onlardan biri isə xaricdə yaşayan “qanuni oğru” Besik Caparidzedir. İstintaqla müəyyən edilib ki, təqsirləndirilən şəxslər maddi gəlir əldə etmək məqsədilə vətəndaşlar arasında yaranan maliyyə mübahisələrinin həllinə fəal şəkildə müdaxilə ediblər. Məlumata görə, cinayətkar nüfuzunu gücləndirmək və mübahisə tərəflərinə psixoloji təzyiq göstərmək məqsədilə xaricdə yaşayan "qanuni oğru" Besik Caparidze də bu prosesə cəlb olunub. Təqsirləndirilən şəxslər onun razılığı ilə tərəflərin iştirakı ilə mütəmadi olaraq qondarma "qanuni məclisləri" təşkil ediblər. Bildirilir ki, Besik Caparidze cinayət aləminin qaydalarına əsasən qərarlar qəbul edib. Bu qərarlara əsasən, mübahisə tərəflərindən birinin digərinə xeyli məbləğdə pul ödəməsi tələb olunub. İstintaq həmçinin müəyyən edib ki, qoyulan öhdəliklər yerinə yetirilmədikdə və ya müəyyən edilmiş müddətlər pozulduqda təqsirləndirilən şəxslər vətəndaşları və onların ailə üzvlərini fiziki zorakılıq, sağlamlığa ağır xəsarət yetirmək və öldürməklə hədələyiblər. Keçirilən axtarışlar zamanı sübut kimi təqsirləndirilən şəxslərin mobil telefonları və kompüter avadanlıqları götürülüb. İstintaqın məlumatına görə, onlar həmin vasitələrlə bir-biri və xaricdə yaşayan cinayətkar avtoritetlə əlaqə saxlayıblar. Bundan başqa, polis tərəfindən aparılan axtarışlar zamanı qanunsuz əldə edilmiş odlu silahlar və döyüş sursatı da aşkarlanaraq maddi sübut kimi götürülüb. Faktla bağlı Cinayət Məcəlləsinin 223¹, 223³, 223⁴ və 236-cı maddələri ilə istintaq aparılır. Bu maddələr üzrə təqsirləndirilən şəxsləri 15 ilədək azadlıqdan məhrumetmə cəzası gözləyir. Daxili İşlər Nazirliyi bəyan edib ki, təşkilatlanmış cinayətkarlığa, o cümlədən "qanuni oğru" aləmi ilə bağlı cinayət fəaliyyətinə qarşı mübarizə qurumun əsas prioritetlərindən biridir və bu cür cinayət sxemlərində iştirak edən hər kəs qanunun bütün sərtliyi ilə cəzalandırılacaq.

www.24news.ge

TƏCİLİ: Xüsusi əməliyyat keçirilib, 29 nəfər saxlanılıb (VİDEO)

Digər xəbərlər