“Dəmir Yolları”nın sabiq rəhbərləri milyonlarla larilik korrupsiya sxemində ittiham olunur

Dövlət Təhlükəsizliyi Xidmətində keçirilən brifinqdə “Gürcüstan Dəmir Yolları” ASC-nin keçmiş rəhbər şəxslərinin iştirak etdiyi genişmiqyaslı korrupsiya sxemi barədə məlumat verilib. 24News.ge xəbər verir ki, DTX-nin açıqlamasına görə, istintaq çərçivəsində ümumilikdə 8 nəfər məsuliyyətə cəlb olunub. Onlardan iki nəfərə ittiham qiyabi qaydada irəli sürüləcək və barələrində axtarış elan olunacaq. Qurumun məlumatına əsasən, təqsirləndirilən şəxslər təşkilatlanmış qrup halında külli miqdarda dələduzluq, saxta sənədlərin hazırlanması və istifadəsi, eləcə də cinayət yolu ilə əldə edilmiş gəlirlərin leqallaşdırılması kimi əməllərdə iştirak ediblər. İstintaq müəyyən edib ki, 2019-cu ildə “Gürcüstan Dəmir Yolları”nın o vaxtkı baş direktoru David Peradze dövlət şirkətinə məxsus iri həcmdə əmlakı mənimsəmək məqsədilə mütəşəkkil cinayətkar qrup yaradıb. Sxemə əsasən, şirkətə məxsus qara metal tullantıları toplanaraq daşınıb, kəsilib və çeşidlənib, beləliklə onların ilkin həcmini müəyyənləşdirmək mümkünsüz hala gətirilib. Bildirilib ki, bu məqsədlə əvvəlcədən seçilmiş şirkətlər vasitəsilə saxta vergi sənədləri hazırlanıb və mənimsənilmiş metalın guya qanuni mənşəyə malik olması görüntüsü yaradılıb. İstintaqın məlumatına görə, 2020–2021-ci illərdə bu sxem vasitəsilə “Gürcüstan Dəmir Yolları”na məxsus ümumilikdə 22 120 ton qara metal qanunsuz olaraq mənimsənilib. Sonradan mənşəyi dəyişdirilən metalı Rustavidə fəaliyyət göstərən şirkət 17,39 milyon lariyə satın alıb. Əldə olunan vəsait müxtəlif şirkətlərin hesablarına köçürülərək nağdlaşdırılıb və qrup üzvləri arasında bölüşdürülüb. Araşdırma zamanı daha bir epizod da üzə çıxıb. Belə ki, 2022-ci ildə dəmir yolu relslərində qüsurların aradan qaldırılması ilə bağlı bağlanmış müqavilə çərçivəsində görülən işlərin həcmi sənədlərdə süni şəkildə artırılıb. Nəticədə podratçı şirkət sifarişçidən 403 844 lari artıq vəsait əldə edib. DTX bildirib ki, təqsirləndirilən şəxslər barəsində Gürcüstan Cinayət Məcəlləsinin bir sıra maddələri ilə istintaq aparılır. Bu maddələr üzrə 9 ildən 12 ilədək azadlıqdan məhrumetmə cəzası nəzərdə tutulur. Qurum həmçinin təsdiqləyib ki, “Gürcüstan Dəmir Yolları”nın keçmiş baş direktoru David Peradzeyə bu iş üzrə qiyabi ittiham irəli sürülüb və onun barəsində axtarış elan olunub.

www.24news.ge

“Dəmir Yolları”nın sabiq rəhbərləri milyonlarla larilik korrupsiya sxemində ittiham olunur

Digər xəbərlər