"Gürcüstanın müdafiə qüvvələri 35 ildə dövlətin əsas dayağına çevrilib" – Kobaxidze

"Bu gün Gürcüstan üçün əlamətdar tarix qeyd olunur. 1991-ci il 30 aprel tarixində müstəqilliyin bərpası ilə yanaşı, ilk çağırışçıların qəbul edilməsi ilə ölkənin müasir müdafiə qüvvələrinin əsası qoyulub". 24News.ge xəbər verir ki, bununla bağlı Baş nazir İrakli Kobaxidze Vazianidə keçirilən, Müdafiə Qüvvələrinin yaradılmasının 35 illiyinə həsr olunmuş tədbirdə çıxış edib. Baş nazir bildirib ki, bu gün artıq gürcü hərbi ruhunun və dövlət möhkəmliyinin simvoluna çevrilib. Onun sözlərinə görə, Gürcüstan ordusu hər zaman ölkənin müstəqilliyinin, suverenliyinin və ərazi bütövlüyünün əsas təminatçısı olub. Kobaxidze vurğulayıb ki, müdafiə qüvvələri yarandığı gündən etibarən bütün döyüşlərdə vətənin azadlığını ləyaqətlə qoruyub. O, həmçinin qeyd edib ki, gürcü hərbçilər beynəlxalq tərəfdaşlarla birlikdə dünyanın müxtəlif bölgələrində qlobal sülh və təhlükəsizlik naminə fədakarlıqla xidmət göstəriblər. Baş nazir çıxışı zamanı vətən uğrunda həlak olan qəhrəmanların xatirəsini də ehtiramla yad edib. O, onların fədakarlığının ölkə tarixinin ayrılmaz və əbədi hissəsi olduğunu bildirib. Hökumət başçısının sözlərinə görə, hazırda Gürcüstanın müdafiə qüvvələri institusional baxımdan tarixinin ən güclü dövrünü yaşayır. O, müasir standartlara uyğun Baş Qərargahın, regional komandanlıqların və xüsusi bölmələrin fəaliyyət göstərdiyini qeyd edib. Eyni zamanda, hərbi təhsil sahəsində Milli Müdafiə Akademiyası və Kadet Hərbi Liseyinin mühüm rol oynadığını vurğulayıb. Kobaxidze əlavə edib ki, regionda mövcud olan mürəkkəb çağırışlara baxmayaraq, hökumət ardıcıl sülh siyasətini davam etdirir. Onun sözlərinə görə, sülh ölkənin birliyi və inkişafının əsas təməlidir, lakin ordu hər zaman torpaqları və vətəndaşların təhlükəsizliyini qorumağa hazırdır. Baş nazir yeni çağırışçıları da təbrik edərək, bu gün etdikləri andın ölkənin təhlükəsizliyi və sabitliyinin qorunması üçün böyük məsuliyyət daşıdığını bildirib. Sonda o, Müdafiə Qüvvələri Günü və 35 illik yubiley münasibətilə hərbçiləri bir daha təbrik edib və ölkəyə rifah və təhlükəsizlik arzulayıb.

www.24news.ge

"Gürcüstanın müdafiə qüvvələri 35 ildə dövlətin əsas dayağına çevrilib" – Kobaxidze

Digər xəbərlər