რა განსხვავებაა პიკოლაქსის ტაბლეტებსა და წვეთებს შორის?

მედიკამენტი პიკოლაქსი არის საქართველოში წარმოებული საფაღარათო, ყაბზობის საწინააღმდეგო საშუალება. იგი გამოიყენება შემდეგი ჩვენებების დროს: მსხვილი ნაწლავის ჰიპოტონიით და დუნე პერისტალტიკით განპირობებული ყაბზობა, ბუასილის, პროქტიტის ან ანალური ნაპრალის არსებობის დროს ფეკალიების გამოყოფის შემსუბუქება, ოპერაციის წინ ან შემდგომ პერიოდში, რენტგენოლოგიური ან ინსტრუმენტული მეთოდებით მუცლის ღრუს ორგანოების კვლევის მოსამზადებელ პერიოდში. ერთი მხრივ, პიკოლაქსი შეიძლება შეგვხვდეს ტაბლეტის ფორმით, მეორე მხრივ კი - წვეთების სახით. პიკოლაქსის ტაბლეტი არის თეთრი ფერის, მრგვალი, ორმხრივამოზნექილი შემოუგარსავი ტაბლეტები ჭდით. ხოლო პიკოლაქსის წვეთები/ხსნარი არის უფერო ან მკრთალი მოყვითალო ფერის, გამჭვირვალე არომატული სითხე. მისი შეძენა, ისევე როგორც ტაბლეტების, პსპ-ს სააფთიაქო ქსელშია შესაძლებელი. პიკოლაქსის ტაბლეტები და წვეთები ერთმანეთისგან რამდენიმე მახასიათებლით განსხვავდება. უპირველეს ყოვლისა, ესაა შემადგენლობა. მიუხედავად იმისა, რომ ორივე სახით წარმოებისას მედიკამენტის აქტიური ნივთიერება არის ნატრიუმის პიკოსულფატი, მისი შემცველობა განსხვავებული აქვთ - ტაბლეტები შეიცავს 10 მგ ნატრიუმის პიკოსულფატს, წვეთები კი - 7.5 მგ-ს. გარდა ამისა, წარმოების ფორმის მიხედვით განსხვავდება დამხმარე ნივთიერებებიც. წარმოების ფორმის მიხედვით განსხვავებულია პიკოლაქსის მიღების წესი და დოზირებაც. მაგალითად, პიკოლაქსის ტაბლეტები ინიშნება მოზრდილებში და ბავშვებში 10 წლის ზემოთ და ამ შემთხვევაში რეკომენდებულია 5-10 მგ-ის მიღება 1-ჯერ დღეში, ძილის წინ. რაც შეეხება პიკოლაქსის წვეთებს, მისი მიღება ზოგადად არაა რეკომენდებული 4 წლამდე ასაკის ბავშვებისთვის, ხოლო 4 წლიდან ზემოთ წვეთების მიღების დოზები დამოკიდებულია ასაკზე, კერძოდ: ● 4-10 წლამდე ბავშვებში დასაშვებია 5-10 წვეთი (2.5-5.0 მგ) მიღება დღეში ერთხელ, ძილის წინ. ● 10+ ასაკის ბავშვებსა და მოზრდილებში კი ინიშნება 10-20 წვეთი (5-10 მგ) დღეში ერთხელ, ძილის წინ. კიდევ ერთი განსხვავება მედიკამენტის ტაბლეტურ და წვეთოვან ფორმას შორის ვლინდება უკუჩვენებაში, კერძოდ, გამომდინარე იქიდან, რომ პიკოლაქსის წვეთები შეიცავს საქაროზას, მისი მიღება არ არის ნებადართული იმ პაციენტებში, რომელთაც აქვთ შაქრიანი დიაბეტი. მცირედად განსხვავდება მედიკამენტის შენახვის ვადებიც - ტაბლეტები ინახება 3 წლის განმავლობაში არა უმეტეს 25ºC ტემპერატურაზე, მშრალ, სინათლისაგან დაცულ და ბავშვებისათვის მიუწვდომელ ადგილას, ხოლო პიკოლაქსის წვეთებიც ინახება არა უმეტეს 25ºC ტემპერატურაზე, სინათლისაგან დაცულ და ბავშვებისათვის მიუწვდომელ ადგილას, თუმცა მისი გამოყენება აღარ არის რეკომენდებული ფლაკონის გახსნიდან 30 დღის შემდეგ.

www.24news.ge

რა განსხვავებაა პიკოლაქსის ტაბლეტებსა და წვეთებს შორის?

სხვა სიახლეები