Polis külli miqdarda narkotik vasitə ələ keçirdi - Saxlanılanlar var (FOTO)

Dünən, gecə saatlarında Acarıstan bölgəsinin Batumi şəhərində Daxili İşlər Nazirliyinin əməkdaşlarının keçirdikləri əməliyyat tədbirləri nəticəsində külli miqdarda narkotik vasitə - 3 kiloqrama qədər kokain, 13 minə qədər "ekstazi" həbi və külli miqdarda heroin müsadirə edilib. 24News.ge xəbər verir ki, bu barədə daxili işlər nazirinin müavini Aleksandre Dalaxveridze keçirdiyi mətbuat konfransında bildirib. Onun sözlərinə görə, qeyd edilən narkotik vasitələrin Batuminin müxtəlif gecə klublarında satışı planlaşdırılıb ki, bu da insanların, xüsusilə də gənclərin sağlamlığına ciddə zərər vuracaqdı. “Acarıstan Polis İdarəsinin Batumi şəhər şöbəsinin əməkdaşlarının həyata keçirdikləri əməliyyat tədbirləri nəticəsində iki Belarus vətəndaşı: 2000-ci il təvəllüdlü R.S. və 2004-cü il təvəllüdlü M.V. -nı qanunsuz olaraq külli miqdarda narkotik vasitələrin əldə edilməsi və saxlanması, narkotik vasitələrin qanunsuz dövriyyəsinə yardım etməkdə ittiham edərək saxlayıblar. Hüquq-mühafizə orqanlarının əməkdaşları narkotik vasitələri təqsirləndirilən şəxslərdən birinin Batumidə kirayədə qaldığı mənzildə axtarış zamanı müsadirə ediblər. Bundan başqa, şəxsin üzərindən 7 ədəd polietilen torbada kokain, ekstazi həbi və narkotik vasitələrin qablaşdırılması üçün zəruri olan digər əşyalar da götürülüb. Həmçinin, müttəhimlərdən birinin mobil telefonunda narkotik vasitələrin satışı üçün seçilmiş konkret yerlərin fotoşəkilləri aşkar edilib. Qeyd olunan narkotik cinayəti ilə əlaqəsi ola biləcək digər şəxslərin müəyyən edilərək cinayət məsuliyyətinə cəlb edilmələri məqsədilə Daxili İşlər Nazirliyi tərəfindən müvafiq kompleks istintaq tədbirləri həyata keçirilir. Faktla bağlı istintaq Cinayət Məcəlləsinin 260 və 18-260 prima maddələri əsasında aparılır, hansı ki, 20 ilədək və ya ömürlük azadlıqdan məhrumetmə cəzasını nəzərdə tutur",- deyə A.Dalaxveridze bildirib. Nazir müavininin sözlərimə görə, Daxili İşlər Nazirliyi gələcəkdə də narkotik tacirlərinə qarşı əməliyyatları davam etdirəcək və bununla bağlı ictimaiyyətə mərhələli şəkildə məlumat veriləcək.

www.24news.ge

Polis külli miqdarda narkotik vasitə ələ keçirdi - Saxlanılanlar var (FOTO)

Digər xəbərlər