İntim görüntüləri yayaraq şəxsi intihara sürükləyən iki nəfər 5 il müddətinə azadlıqdan məhrum edilib

Qurcaani Rayon Məhkəməsi şəxsi intihara sürükləmək, şəxsi həyatın sirrini əks etdirən məlumatları qanunsuz saxlamaq və yaymaqda təqsirləndirilən iki nəfəri təqsirli bilib. Məhkəmə hər iki şəxsə 5 il müddətinə azadlıqdan məhrumetmə cəzası verib. 24News.ge xəbər verir ki, bu barədə Prokurorluq məlumat yayıb. Prokurorluğun məlumatına görə, məhkəmədə araşdırılan sübutlarla müəyyən edilib ki, təqsirləndirilən şəxslər saxta “Facebook” səhifəsindən istifadə edərək zərərçəkənə məxsus intim xarakterli foto və video materialları əldə ediblər. Daha sonra həmin materialları zərərçəkənin şərəf və ləyaqətini alçaltmaq məqsədilə qanunsuz şəkildə yayıblar, onun ailə üzvlərinə və tanışlarına göndəriblər. Nəticədə zərərçəkən ağır psixoloji vəziyyətə düşüb və intihar edərək həyatına son qoyub. Qurcaani Rayon Məhkəməsi təqsirləndirilən şəxsləri Cinayət Məcəlləsinin 115-ci maddəsinin birinci hissəsi — hədə-qorxu və qəddar rəftar yolu ilə şəxsi intihara sürükləmə, həmçinin 157¹-ci maddəsinin ikinci hissəsi — sosial şəbəkə vasitəsilə şəxsi həyatın sirrini təşkil edən məlumatların qanunsuz saxlanılması və yayılması üzrə təqsirli bilib. Cinayətlərin məcmusu üzrə hər iki şəxsə 5 il müddətinə azadlıqdan məhrumetmə cəzası təyin edilib.

www.24news.ge

İntim görüntüləri yayaraq şəxsi intihara sürükləyən iki nəfər 5 il müddətinə azadlıqdan məhrum edilib

Digər xəbərlər