Amazonun yük təyyarəsi qəzaya uğrayıb – 5 nəfər ölüb

Amazon Prime Air-ə məxsus Boeing 767-300 yük təyyarəsi Mayami Beynəlxalq Hava Limanına enərkən uçuş-enmə zolağından çıxaraq qəzaya uğrayıb. Hadisə nəticəsində azı 5 nəfər ölüb. 24News.ge xəbər verir ki, Reuters-in məlumatına görə, təyyarə eniş zamanı ərazidə olan bir neçə avtomobilə də çırpılıb. Qəza nəticəsində daha 5 nəfər yaralanıb, onlardan 3-nün vəziyyəti ağır qiymətləndirilir. Təyyarənin pilotu və ikinci pilotunun da qəza zamanı təyyarənin daxilində sıxışdığı bildirilib. Boeing 767-300 tipli yük təyyarəsi yerli vaxtla saat 14:00-dan bir qədər əvvəl Puerto-Rikonun San-Xuan şəhərindəki Luis Munyos Marin Beynəlxalq Hava Limanından havaya qalxıb. Təyyarə Amazon üçün 21 Air şirkəti tərəfindən istismar olunurdu. ABŞ Milli Nəqliyyat Təhlükəsizliyi Şurası (NTSB) hadisəni araşdırmaq üçün sədr Cennifer Homendinin rəhbərliyi ilə xüsusi qrup yaradıb. Qurumun ilk mətbuat konfransını sentyabrın 7-də Mayamidə keçirəcəyi açıqlanıb. Amazon şirkətinin nümayəndəsi Kelli Nantel bildirib ki, şirkət hadisə ilə bağlı məlumatları toplamaqda davam edir və yerli hakimiyyət orqanları ilə sıx əməkdaşlıq edir. Boeing və 21 Air də aviaqəzanın araşdırılmasında ABŞ hökumətinə dəstək göstərəcəklərini açıqlayıblar.

www.24news.ge

Amazonun yük təyyarəsi qəzaya uğrayıb – 5 nəfər ölüb

Digər xəbərlər