Marneulinin bütün bağçalarına at əti verildiyi müəyyən olunub

Marneuli Uşaq Bağçaları Birliyi bağçalara at ətinin daxil olması məsələsini şərh edib. 24News.ge Marneuli radiosuna istinadən xəbər verir ki, Birliyin hüquqşünası Edişer Kutalianın sözlərinə görə, aparılan araşdırmalar nəticəsində Marneulinin bütün (11) bağçasında at əti DNT-si aşkarlanıb. O bildirib ki, müvafiq yoxlama may ayında aparılıb, bundan sonra ət məhsulları dərhal möhürlənib. Uşaq Bağçaları Birliyinin nümayəndəsi izah edir ki, ət təchizatına cavabdeh olan şirkətlə əməkdaşlığa xitam verilib və məsələyə müvafiq qurumlar cəlb olunub. “At ətinə gəldikdə, yoxlama başlayıb məhsullar möhürləndikdən sonra uşaqlar bir qram da olsun həmin ətdən yeməyiblər. Ət məhsulları möhürləndi və müvafiq qurumlar tərəfindən işin araşdırılmasına başlanıldı. "B.G.M.1" MMC müvafiq tender əsasında Marneuli bələdiyyəsi ərazisindəki Uşaq Bağçaları Birliyi miqyasında, konkret olaraq 11 uşaq bağçasına ət məhsulları gətirirdi. May ayında aparılan yoxlama nəticəsində həmin ətdə at DNT-sinin olduğu müəyyən edildi. Sözügedən məhsul müvafiq qurumlar tərəfindən möhürlənərək saxlanıldı və uşaq bağçalarında istifadə olunmadı”, – deyə Edişer Kutalia bildirib. Hüquqşünasın sözlərinə görə, sözügedən şirkət keçən il də bağçaları ətlə təchiz edirdi, lakin o zaman heç bir problem yaşanmamışdı. Onun bildirib ki, Marneuli bağçalarında planlı yoxlama ildə 8 dəfə keçirilir. Ətdə laboratoriya yolu ilə at DNT-sinin təsdiqləndiyi uşaq bağçalarının siyahısı: • Marneuli şəhər 1 saylı uşaq bağçası • Marneuli şəhər 3 saylı uşaq bağçası • Marneuli şəhər 4 saylı uşaq bağçası • Saimerlo kənd uşaq bağçası • Qızılhacılı kənd uşaq bağçası • Tamarisi kənd uşaq bağçası • Şaumyani erməni uşaq bağçası • Xixani kənd uşaq bağçası • Kəpənəkçi kənd uşaq bağçası • Algeti kənd uşaq bağçası • Sadaxlı kənd uşaq bağçası. Xatırladaq ki, Dövlət Təhlükəsizliyi Xidmətinin (DTX) Korrupsiyaya Qarşı Mübarizə Agentliyinin əməkdaşları külli miqdarda dələduzluq və saxtakarlıq faktı ilə bağlı, məhkəmə qərarı əsasında iki nəfəri saxlayıblar. Bildirilib ki, söhbət Marneuli və Kareli bələdiyyələrinin uşaq bağçalarına mal əti əvəzinə aldadıcı yolla at ətinin çatdırılması faktlarından gedir. Faktla bağlı istintaq Cinayət Məcəlləsinin 180-ci maddəsinin 3-cü hissəsinin 'b' bəndi (külli miqdarda dələduzluq), həmçinin 197-ci maddəsinin 1-ci hissəsi (saxtakarlıq) üzrə aparılır. Bu cinayətlərə görə 6 ildən 9 ilədək azadlıqdan məhrumetmə cəzası nəzərdə tutulur".

www.24news.ge

Marneulinin bütün bağçalarına at əti verildiyi müəyyən olunub

Digər xəbərlər