„მამედ გაზმა“ აბონენტებს გაზის ახალი ტარიფის შესახებ SMS გაუგზავნა

„მამედ გაზმა“, რომელიც მარნეულის მუნიციპალიტეტის სოფელ გიზილჰაჯილს და ქალაქის 26 მაისის ქუჩის ნაწილს ბუნებრივი აირით ამარაგებს, აბონენტებს ახალი ბუნებრივი აირის ტარიფის შესახებ SMS შეტყობინება გაუგზავნა. 24News.ge იუწყება, რომ აბონენტებისთვის გაგზავნილ შეტყობინებაში ნათქვამია, რომ ბუნებრივი აირის ტარიფი 1.3599 ლარი/კუბურ მეტრზე იქნება. აღსანიშნავია, რომ ბოლო ერთი თვის განმავლობაში „მამედ გაზსა“ და ენერგეტიკისა და წყალმომარაგების ეროვნულ მარეგულირებელ კომისიას (SEMEK) შორის ბუნებრივი აირის ტარიფთან დაკავშირებით უთანხმოება მიმდინარეობდა. SEMEK-ის განცხადებაში ნათქვამია, რომ სოფელ გიზილჰაჯილის მაცხოვრებლებმა ბუნებრივი აირის მოხმარებისთვის მხოლოდ კომისიის მიერ დამტკიცებული 47 თეთრი/კუბურ მეტრზე (დღგ-ს ჩათვლით) ტარიფით უნდა გადაიხადონ და მოსახლეობისთვის მოქმედ ტარიფში არანაირი ცვლილება არ შესულა. 24News.ge საინფორმაციო პორტალთან საუბრისას, კომპანია „მამედ გაზ“-ის დირექტორმა, ნარიმან ალაჰვერდიევმა, ინციდენტი კომპანიის წინააღმდეგ მიმართულ ნაბიჯად შეაფასა. მან განაცხადა, რომ არ ეთანხმება SEMEK-ის მიერ წაყენებულ ბრალდებებს. კომპანიის დირექტორის თქმით, ბუნებრივი აირი Mamed Gaz-ს სხვა გაზგამანაწილებელ კომპანიებთან შედარებით უფრო მაღალ ფასად მიეყიდება და შესაბამისად, კომპანიას თანაბარი კონკურენციის პირობებში ფუნქციონირება არ შეუძლია. ნარიმან ალაჰვერდიევის თქმით, მარეგულირებელი ორგანოს მიერ წარდგენილი მოთხოვნები კანონმდებლობას ეწინააღმდეგება და კომპანია თავის უფლებებს ბოლომდე დაიცავს, მათ შორის სასამართლოში.

www.24news.ge

„მამედ გაზმა“ აბონენტებს გაზის ახალი ტარიფის შესახებ SMS გაუგზავნა

სხვა სიახლეები