ეუთო-ს საპარლამენტო ასამბლეამ „ჰააგის დეკლარაცია“ მიიღო, რომელიც საქართველოს შესახებ რეზოლუციასაც მოიცავს

ეუთო-ს საპარლამენტო ასამბლეამ „ჰააგის დეკლარაცია“ მიიღო, რომელიც საქართველოს შესახებ რეზოლუციასაც მოიცავს. საქართველოს შესახებ რეზოლუციის – „საქართველოში არჩევნების მთლიანობისა და ფუნდამენტური თავისუფლებების დაცვა“ ინიციატორი ამერიკელი კონგრესმენი ჯო უილსონია. რეზოლუციის თანახმად, „ეუთო-ს საპარლამენტო ასამბლეა: 1. შეშფოთებულია 2024 წლის 26 ოქტომბერს საქართველოში ჩატარებული საპარლამენტო არჩევნებით და აღნიშნავს, რომ ეუთო-ს/დემოკრატიული ინსტიტუტებისა და ადამიანის უფლებათა ოფისის სადამკვირვებლო მისიის ანგარიშებში გამოკვეთილია მნიშვნელოვანი დარღვევები, მათ შორის ამომრჩეველთა დაშინება, საჯარო მოხელეებზე ზეწოლა და ხმის მიცემის პროცესის საიდუმლოების ნაკლებობა; 2. შეშფოთებულია გაყალბების, ხმის მიცემის გაყალბების, ამომრჩეველთა მოსყიდვის, „კარუსელის“ ტიპის ხმის მიცემის და 2025 წლის ოქტომბრის ადგილობრივი არჩევნების დროს საარჩევნო უბნებზე ოპოზიციის დამკვირვებლებისთვის ხელის შეშლის მცდელობებით; 3. გმობს შემზღუდავი კანონმდებლობის მიღებას, კერძოდ, „უცხოური გავლენის გამჭვირვალობის შესახებ კანონს“, შეკრებებისა და მანიფესტაციების შესახებ კანონში შეტანილ ცვლილებებს, ასევე ადმინისტრაციულ სამართალდარღვევათა კოდექსს, რომლებიც მკვეთრად ზღუდავენ გაერთიანების, მედიის, გამოხატვისა და შეკრების თავისუფლებას, რაც სამოქალაქო საზოგადოებაზე შემაშფოთებელ ეფექტს ქმნის; 4. შეშფოთებულია ადმინისტრაციული რესურსების სისტემატური გამოყენებითა და ინსტიტუციური ძალაუფლების კონსოლიდაციით, რამაც შექმნა არათანაბარი სათამაშო გარემო, შეარყია საზოგადოების ნდობა დემოკრატიული პროცესის მიმართ და შექმნა ფაქტობრივი ერთპარტიული მმართველობა; 5. გმობს პოლიტიკური ოპოზიციის წევრების, მედიის წარმომადგენლებისა და მშვიდობიანი მომიტინგეების მიმართ თვითნებური დაკავებების, დაპატიმრებებისა და შევიწროების მუდმივ გამოყენებას, რომლებიც საქართველოს დემოკრატიულ და ევროპულ მომავალს ემხრობიან; 6. კიდევ ერთხელ ადასტურებს დემოკრატიული კონტროლისა და ბალანსის მექანიზმების ჩამოშლას და აცხადებს, რომ ეუთო-ს ვალდებულებებისგან გადახვევა პირდაპირ საფრთხეს უქმნის საქართველოს ევროატლანტიკური ინტეგრაციის გზას; 7. ხაზს უსვამს, რომ ნებისმიერი არჩევნების შედეგის ლეგიტიმურობა დამოკიდებულია თავისუფალი, სამართლიანი და გამჭვირვალე არჩევნების საერთაშორისო სტანდარტების დაცვაზე. ეუთო-ს საპარლამენტო ასამბლეის წევრები მოუწოდებენ საქართველოს ხელისუფლებას: 8. გაათავისუფლონ ყველა ქართველი პოლიტიკური პატიმარი, როგორც ეს იდენტიფიცირებულია ეროვნული და საერთაშორისო უფლებადამცველი ჯგუფების მიერ; 9. გააუქმოს ყველა ის კანონმდებლობა, რომელიც ზღუდავს ფუნდამენტურ თავისუფლებებს და ეწინააღმდეგება საქართველოში საერთაშორისო ადამიანის უფლებების ვალდებულებებს; 10. დაიწყოს ყოვლისმომცველი და გამჭვირვალე გამოძიება 2024 და 2025 წლების არჩევნების ყველა დაფიქსირებულ საარჩევნო დარღვევაზე და პასუხისგებაში მისცეს პასუხისმგებელი პირები; 11. დაიწყოს ნამდვილი რეფორმების პროცესი, ვენეციის კომისიასა და OSCE/ODIHR-თან კონსულტაციით, სასამართლო სისტემისა და ცენტრალური საარჩევნო კომისიის დამოუკიდებლობის აღსადგენად; 12. უზრუნველყოს უსაფრთხო გარემო სამოქალაქო საზოგადოებისა და დამოუკიდებელი მედიისთვის, რათა მათ იმოქმედონ ანგარიშსწორების შიშის გარეშე; ეუთო-ს საპარლამენტო ასამბლეა მოუწოდებს თავის წევრებს და საერთაშორისო საზოგადოებას: 13. მუდმივად დაუჭიროს მხარი საქართველოს ხელისუფლების მიერ დემოკრატიული ნორმების დაუყოვნებლივ აღდგენასა და მომავალი საარჩევნო პროცესების ორგანიზებას, რომლებიც სრულად შეესაბამება ეუთო-ს ვალდებულებებს; 14. არ აღიაროს საქართველოში არჩევნების ნებისმიერი შედეგი, რომელიც არ არის სერტიფიცირებული, როგორც თავისუფალი, სამართლიანი და დემოკრატიული სანდო საერთაშორისო და ადგილობრივი სადამკვირვებლო მისიების მიერ; 15. დარჩეს ფხიზლად საქართველოში ადამიანის უფლებების მდგომარეობის მონიტორინგში და უზრუნველყოს ქართველი ხალხის დემოკრატიული ღირებულებებისკენ სწრაფვის უწყვეტი მხარდაჭერა“.

www.24news.ge

ეუთო-ს საპარლამენტო ასამბლეამ „ჰააგის დეკლარაცია“ მიიღო, რომელიც საქართველოს შესახებ რეზოლუციასაც მოიცავს

სხვა სიახლეები