სემეკსა და „მამედ გაზს“ შორის ტარიფთან დაკავშირებული დავა გრძელდება — კომპანიის ხელმძღვანელმა ბრალდებებს უპასუხა

ბოლო დღეებში მარნეულის მუნიციპალიტეტის ყიზილჰაჯილოს სოფლისა და ქალაქ მარნეულის 26 მაისის ქუჩაზე მცხოვრებ აბონენტებს ბუნებრივი აირით მომარაგების საკითხზე კომპანია „მამედ გაზსა“ და საქართველოს ენერგეტიკისა და წყალმომარაგების მარეგულირებელ ეროვნულ კომისიას (სემეკი) შორის ტარიფებთან დაკავშირებით სერიოზული უთანხმოება წარმოიშვა. რამდენიმე დღის წინ კომპანია „მამედ გაზმა“ აბონენტებს SMS-შეტყობინება გაუგზავნა, რომელშიც აღნიშნული იყო, რომ ბუნებრივი აირის ტარიფი 1 ლარი და 29 თეთრი გახდებოდა. ამის შემდეგ სემეკმა განცხადება გაავრცელა, სადაც აღნიშნა, რომ კომპანიის მიერ აბონენტებისთვის გაგზავნილ SMS-შეტყობინებაში მოცემული ინფორმაცია სინამდვილეს არ შეესაბამება და მოქალაქეების შეცდომაში შეყვანას ემსახურება. კომისიის განმარტებით, ყიზილჰაჯილოს სოფლის მოსახლეობამ ბუნებრივი აირის მოხმარებისთვის გადახდა მხოლოდ სემეკის მიერ დამტკიცებული 47 თეთრი/კუბური მეტრის (დღგ-ის ჩათვლით) ტარიფის მიხედვით უნდა განახორციელოს და მოქმედი ტარიფი არ შეცვლილა. აღნიშნულ საკითხთან დაკავშირებით საინფორმაციო პორტალ 24News.ge-თან საუბრისას კომპანია „მამედ გაზის“ დირექტორმა ნარიმან ალაჰვერდიევმა განაცხადა, რომ მიმდინარე პროცესები კომპანიის წინააღმდეგ გადადგმულ ნაბიჯებად მიაჩნია. მისი თქმით, იგი არ ეთანხმება სემეკის მიერ გაჟღერებულ ბრალდებებს. კომპანიის ხელმძღვანელის განცხადებით, „მამედ გაზი“ ბუნებრივ აირს სხვა გაზგამანაწილებელ კომპანიებთან შედარებით უფრო მაღალ ფასად ყიდულობს, რის გამოც კომპანია თანაბარი კონკურენციის პირობებში საქმიანობას ვერ ახერხებს. ნარიმან ალაჰვერდიევის თქმით, მარეგულირებელი ორგანოს მიერ წამოყენებული მოთხოვნები მოქმედ კანონმდებლობას ეწინააღმდეგება და კომპანია საკუთარი უფლებების დასაცავად ყველა სამართლებრივ მექანიზმს გამოიყენებს, მათ შორის სასამართლოსაც. კითხვაზე, თუ რა ტარიფით გაიყიდება ბუნებრივი აირი მომავალში, კომპანიის დირექტორმა აღნიშნა, რომ ტარიფი კომპანიის ეკონომიკური გათვლების საფუძველზე განისაზღვრება. მისი განცხადებით, თუ ბუნებრივი აირის შეძენა კომპანიისთვის კვლავაც მაღალი ფასით გაგრძელდება, არ არის გამორიცხული, რომ მომავალში აბონენტებისთვის ტარიფი 1 ლარ და 70 თეთრამდე გაიზარდოს.

www.24news.ge

სხვა სიახლეები