SEMEK ilə "Mamed Gaz" arasında tarif mübahisəsi davam edir – şirkət rəhbəri ittihamlara cavab verib (VİDEO)

Son günlər Marneuli bələdiyyəsinin Qızılhacılı kəndi və Marneuli şəhərinin 26 May küçəsində yaşayan abonentləri təbii qazla təmin edən "Mamed Gaz" şirkəti ilə Energetika və Su Təchizatı üzrə Milli Tənzimləmə Komissiyası (SEMEK) arasında tarif məsələsi ilə bağlı ciddi fikir ayrılığı yaranıb. Bir neçə gün əvvəl "Mamed Gaz" şirkəti abonentlərə göndərdiyi SMS bildirişində təbii qaz tarifinin 1 lari 29 tetri olacağını açıqlayıb. Bunun ardınca SEMEK bəyanat yayaraq şirkətin abonentlərə göndərdiyi SMS-də yer alan məlumatların həqiqəti əks etdirmədiyini və vətəndaşları çaşdırmağa yönəldiyini bildirib. Komissiyanın açıqlamasında qeyd olunub ki, Qızılhacılı kəndinin sakinləri təbii qazdan istifadəyə görə yalnız SEMEK tərəfindən təsdiqlənmiş 47 tetri/kubmetr (ƏDV daxil) tarif əsasında ödəniş etməlidirlər və qüvvədə olan tarif dəyişməyib. Məsələ ilə bağlı 24News.ge xəbər portalına danışan "Mamed Gaz" şirkətinin direktoru Nəriman Allahverdiyev isə baş verənləri şirkətə qarşı yönəlmiş addımlar kimi qiymətləndirib. O, SEMEK tərəfindən səsləndirilən ittihamlarla razılaşmadığını bildirib. Şirkət rəhbərinin sözlərinə görə, "Mamed Gaz"a təbii qaz digər qazpaylayıcı şirkətlərlə müqayisədə daha yüksək qiymətə satılır və bu səbəbdən şirkət bərabər rəqabət şəraitində fəaliyyət göstərə bilmir. Nəriman Allahverdiyev bildirib ki, tənzimləyici qurumun irəli sürdüyü tələblər qanunvericiliyə ziddir və şirkət öz hüquqlarını məhkəmə də daxil olmaqla hüquqi müstəvidə sonadək müdafiə edəcək. Qazın gələcəkdə hansı tariflə satılacağı barədə suala cavab verən şirkət rəhbəri qeyd edib ki, tarif şirkətin iqtisadi hesablamaları əsasında müəyyən edilir. Onun sözlərinə görə, təbii qaz şirkətə yüksək qiymətə satılmağa davam edərsə, gələcəkdə abonentlər üçün tarifin 1 lari 70 tetriyədək artırılması da istisna olunmur. Mövzu ilə bağlı daha ətraflı əməkdaşlarımızın hazırladığı reportajı təqdim edirik:

www.24news.ge

SEMEK ilə "Mamed Gaz" arasında tarif mübahisəsi davam edir – şirkət rəhbəri ittihamlara cavab verib (VİDEO)

Digər xəbərlər