İran və ABŞ arasında razılıq əldə edilib, memorandum və razılaşmalar barədə mediada məlumatlar dərc olunub

ABŞ ilə İran arasında İslamabad danışıqları nəticəsində hazırlanan memorandum müharibənin dayandırılmasına yönəlib. 24News.ge xəbər verir ki, bunu İran Xarici İşlər Nazirliyinin sözçüsü İsmayıl Bəqai bildirib. "Hazırda nəzərdən keçirilən İslamabad memorandumu müharibənin dayandırılmasına yönəlib və bu mərhələdə nüvə məsələsini müzakirə etməmək qərara alınıb", - deyə o əlavə edib. Bəqainin sözlərinə görə, memorandumun imzalanmasının dəqiq vaxtı məlum deyil: "Hərçənd bu, sabah olmayacaq, imzalanmanın yaxın günlərdə baş verməsi ehtimalı istisna edilmir. Bununla belə, qarşı tərəfin qeyri-sabitliyi səbəbindən bu proseslə bağlı istənilən bəyanatlarda ehtiyatlı olmaq lazımdır". İranın xarici işlər naziri Abbas Əraqçi bildirib ki, ABŞ və İran arasında hazırlanmış qarşılıqlı anlaşma memorandumu nüvə proqramı, sanksiyaların yumşaldılması, Hörmüz boğazındakı blokada və digər mühüm məsələləri əhatə edir. İran KİV-lərinə verdiyi müsahibədə Əraqçi qeyd edib ki, tərəflər arasında hələ imzalanmamış sənəd həmçinin Livan münaqişəsi və “digər bütün cəbhələr”lə bağlı həll mexanizmlərini də özündə ehtiva edir. Nazirin sözlərinə görə, memorandum Vaşinqton və Tehran arasında mövcud gərginliyin digər aspektlərinə də toxunur. Sənəddə ABŞ tərəfindən İranın suverenliyinə hörmət göstərilməsi ilə bağlı yazılı öhdəliyin yer alması nəzərdə tutulur. İranlı diplomat bildirib ki, Tehran diplomatik həll yoluna üstünlük versə də, ABŞ fərqli yol seçəcəyi təqdirdə ölkəsi hərbi qarşıdurmaya qayıtmağa hazırdır. Abbas Əraqçi əlavə edib ki, qarşılıqlı anlaşma memorandumunda nəzərdə tutulan şərtlər yerinə yetirilmədiyi halda yekun saziş imzalanmayacaq. Qeyd edək ki, Pakistanın Baş naziri Şahbaz Şərif də X hesabında paylaşım edib. Baş nazir yazıb: "Biz sülh müqaviləsinə əvvəlkindən daha yaxınıq. Növbəti 24 saat ərzində yekun razılaşma gözlənilir, Pakistan bundan dərhal sonra sülh müqaviləsinin elektron imzalanmasına hazırlaşacaq, ardınca isə gələn həftə texniki səviyyəli danışıqlar başlayacaq". Bundan başqa "Mehr" xəbər agentliyinin məlumatına əsasən, İranın dondurulmuş səhmlərinin yarısı ABŞ ilə danışıqların ilkin mərhələsində geri qaytarıla bilər. Qeyd olunub ki, Qətər tərəfi yeni planla problemi aradan qaldırmağa çalışıb: "Bu plana əsasən İran 12 milyard dollar əldə edəcək, bura İranın Qətərdəki 6 milyard dollarlıq dondurulmuş aktivlərinin blokdan çıxarılması və kredit, yaxud kredit xətti formasında əlavə 6 milyard dollar daxildir. İran və ABŞ arasında 2023-cü il razılaşmasına əsasən (mərhum Prezident İbrahim Rəisinin hökuməti dövründə), İranın Qətərdəki aktivlərindən 6 milyard dollar humanitar ehtiyaclara yönəldilməlidir. Həmçinin qərara alınıb ki, bu vəsaitlərin xərclənmə qaydası əvvəlki kimi həmin çərçivə razılaşmasına tabe olacaq".

www.24news.ge

İran və ABŞ arasında razılıq əldə edilib, memorandum və razılaşmalar barədə mediada məlumatlar dərc olunub

Digər xəbərlər