ქვემო ბოლნისის მკვიდრი, რომელიც სავარაუდოდ თურქეთში სამუშაოდ წაიყვანეს, გაუჩინარდა

ბოლნისის მუნიციპალიტეტის სოფელ ქვემო ბოლნისის მკვიდრი, 47 წლის ელმან ისაევი, უკვე თითქმის ერთი თვეა სახლიდან გავიდა და უკან აღარ დაბრუნებულა. მისი მშობლების მიერ 24News-ის საინფორმაციო პორტალისთვის მიწოდებული ინფორმაციის თანახმად, მათი შვილი თანასოფლელმა ნადირ მირზალიევმა თურქეთში სამუშაოდ წაიყვანა. მშობლების თქმით, 7 მაისს ნადირ მირზალიევმა ელმან ისაევთან ერთად თურქეთის საზღვარი გადაკვეთა, თუმცა ორი დღის შემდეგ თავად უკან დაბრუნდა. მას შემდეგ კი ელმან ისაევის შესახებ არანაირი ინფორმაცია არ არსებობს. ელმან ისაევის მშობლები აცხადებენ, რომ ეჭვობენ, მათი შვილის მიმართ ნადირ მირზალიევის მხრიდან შესაძლოა რაიმე ქმედება განხორციელებულიყო. მათი თქმით, აღნიშნულ საკითხთან დაკავშირებით უკვე მიმართეს პოლიციას. ელმან ისაევის ახლობლების განცხადებით, მიუხედავად იმისა, რომ სამართალდამცავმა ორგანოებმა დაადასტურეს, რომ მათ 7 მაისს ერთად გადაკვეთეს სასაზღვრო-გამშვები პუნქტი და თურქეთში გადავიდნენ, საქმეს სათანადო ყურადღებით არ ეკიდებიან. მათი თქმით, უკვე თითქმის ერთი თვეა, ელმან ისაევის შესახებ არანაირი ინფორმაცია არ მიუღიათ. ჩვენი საინფორმაციო პორტალის ჟურნალისტები აღნიშნულ საკითხთან დაკავშირებით ნადირ მირზალიევს დაუკავშირდნენ. მან გავრცელებული ბრალდებები უარყო და განაცხადა, რომ ელმან ისაევს აეროპორტში შემთხვევით შეხვდა, ხოლო თურქეთში ერთად არ გადაადგილებულან. მომხდარ ფაქტთან დაკავშირებით დავუკავშირდით საქართველოს შინაგან საქმეთა სამინისტროსაც. უწყების ინფორმაციით, ჩატარებული საგამოძიებო მოქმედებების შესახებ ოჯახს ინფორმაცია მიეწოდა და ამ ეტაპზე საქმეზე გამოძიება კვლავ გრძელდება.

www.24news.ge

ქვემო ბოლნისის მკვიდრი, რომელიც სავარაუდოდ თურქეთში სამუშაოდ წაიყვანეს, გაუჩინარდა

სხვა სიახლეები