რუსთავის მაგისტრალის მეორე მონაკვეთის მშენებლობის გამო, კომპანიას მიწას და შენობებს იძულებით ჩამოართმევენ

შპს „ჯი ემ ფარმასიუთიქალსს“ თბილისში, რუსთავის გზატკეცილზე, მის საკუთრებაში არსებულ 14 031 კვ.მ მიწის ნაკვეთსა და მასზე მდებარე შენობა-ნაგებობებს იძულებით ჩამოართმევენ - ბრძანებას ეკონომიკისა და მდგრადი განვითარების მინისტრი, მარიამ ქვრივიშვილი აწერს ხელს. კომპანიის საკუთრება ექცევა თბილისი-წითელი ხიდის საავტომობილო გზის თბილისი-რუსთავის მეორე მონაკვეთის (კმ 5+000–8+300) მშენებლობის პროექტი ზემოქმედების არეალში. დოკუმენტის მიხედვით, პროექტის განმახორციელებელ მუნიციპალურ განვითარების ფონდსა და მესაკუთრეს შორის გამოსყიდვასთან დაკავშირებული მოლაპარაკებები ვერ შედგა. „ფონდი მიუთითებს, რომ აღნიშნულ მონაკვეთზე მდებარე მიწის ნაკვეთის მესაკუთრე შპს „ჯი ემ ფარმასიუთიქალთან“ შეთანხმება პროექტის ზემოქმედების ქვეშ მოქცეული უძრავი ქონების (ნაწილის) გამოსყიდვასთან დაკავშირებით ვერ შედგა“, - აღნიშნულია დოკუმენტში. ეკონომიკისა და მდგრადი განვითარების სამინისტრომ გზის მშენებლობა მიიჩნია აუცილებელი საზოგადოებრივი საჭიროების პროექტად და ფონდს ექსპროპრიაციის უფლება მიენიჭა. „საერთაშორისო მნიშვნელობის თბილისი-წითელი ხიდის (აზერბაიჯანის რესპუბლიკის საზღვარი) საავტომობილო გზის თბილისი-რუსთავის მეორე მონაკვეთის (კმ 5-000-8-300) მშენებლობის პროექტი ჩაითვალოს აუცილებელი საზოგადოებრივი საჭიროების მქონე პროექტად და სსიპ – მუნიციპალური განვითარების ფონდს მიენიჭოს ექსპროპრიაციის უფლება პროექტის არეალში მოქცეულ შპს „ჯი ემ ფარმასიუთიქალსის“ (ს/ნ 211385268) საკუთრებაში არსებულ ქალაქ თბილისში, რუსთავის გზატკეცილზე №52-ში მდებარე 151 117 კვ.მ არასასოფლო-სამეურნეო დანიშნულების მიწის ნაკვეთის (ს.კ №81.05.02.138) ნაწილზე – 14 031 კვ.მ მიწის ნაკვეთზე და მასზე მდებარე შენობა-ნაგებობებზე“, - ვკითხულობთ ბრძანებაში. ინფორმაციისთვის, ექსპროპრიაციის შესახებ გადაწყვეტილების გასაჩივრება გაცნობიდან ერთი თვის ვადაშია შესაძლებელია.

www.24news.ge

რუსთავის მაგისტრალის მეორე მონაკვეთის მშენებლობის გამო, კომპანიას მიწას და შენობებს იძულებით ჩამოართმევენ

სხვა სიახლეები