Sürücülərin nəzərinə: 1 maydan etibarən cərimələrin miqdarı artırılır (VİDEO)

Gürcüstanda “İnzibati Xətalar Məcəlləsi”nə edilən dəyişikliklər 1 maydan qüvvəyə minir. Yeni qaydalara əsasən, yol hərəkəti qaydalarının pozulmasına görə cərimələr artırılır və bir sıra yeni inzibati xətalar tətbiq edilir. 24News.ge xəbər verir ki, dəyişikliklərə görə, nəqliyyat vasitəsinin səkidə və ya piyada keçidində dayanması və ya saxlanılması artıq yeni qayda pozuntusu kimi müəyyən edilir. Bu əmələ görə Tbilisi, Kutaisi, Batumi və digər iri şəhərlərdə 100 lari, digər ərazilərdə isə 10 lari cərimə nəzərdə tutulur. Sürücülərə “yanğın hidrantı yanında dayanmaq qadağandır” adlı yeni nişanın tələblərinə əməl etməmək də 200 lari cərimə və avtomobilin cərimə meydançasına aparılması ilə nəticələnə bilər. Avtobus zolaqlarında (BUS LANE) hərəkət qaydaları da sərtləşdirilib. Bu zolaqlarda hərəkətə görə 100 lari cərimə və 15 bal azalma tətbiq ediləcək, təkrarlanma halında cərimə 150 lari və 30 bal azalmaya qədər yüksəlir. Əks istiqamətdə BUS LANE-də hərəkət və ya dayanma isə 200–300 lari cərimə və 20–30 bal azalma ilə nəticələnəcək. Yeni qaydalara əsasən, yol hərəkətində manevr qaydalarının pozulmasına görə cərimə 100 lariyə qədər artırılır və 20 bal silinir. 15 km/saatdan çox sürət həddinin aşılması isə 50–100 lari cərimə ilə cəzalandırılacaq. Təhlükəsizlik kəmərindən istifadə etməməyə görə cərimə 50 lari müəyyən edilib və 10 bal azaldılır. Sükan arxasında mobil telefondan istifadə də 50 lari cərimə ilə cəzalandırılacaq. Bundan əlavə, “drift” zamanı zədə və ya qəza yaratmaq 500 lari cərimə və 6 aylıq sürücülük hüququnun dayandırılması ilə nəticələnəcək. Qəza vəziyyəti və ya tıxac yaradan təkrarlanan qayda pozuntularına görə isə 300 lari cərimə və 30 bal azalma tətbiq ediləcək. Yeni qaydalara görə, Tbilisidə təyinatı olmayan yük avtomobillərinin hərəkəti 500 lari cərimə ilə məhdudlaşdırılır. Qeyd olunur ki, qanunvericilikdə edilən dəyişikliklər yol hərəkətində təhlükəsizliyi artırmaq və qayda pozuntularını azaltmaq məqsədi daşıyır.

www.24news.ge

Sürücülərin nəzərinə: 1 maydan etibarən cərimələrin miqdarı artırılır (VİDEO)

Digər xəbərlər