Parlament bir sıra yenilikləri özündə cəmləşdirən məktəblərlə bağlı qanun layihəsini dəstəklədi

Parlament məktəblərlə bağlı hökumətin təklif etdiyi dəyişiklikləri dəstəkləyib. 24News.ge xəbər verir ki, “Ümumi təhsil haqqında” qanuna edilən dəyişikliklər paketi sürətləndirilmiş qaydada müzakirə olunaraq 85 səslə (10 əleyhinə) üçüncü oxunuşda qəbul edilib. Qanuna əsasən, tam ümumi təhsil ən azı 11, ən çoxu isə 12 ili əhatə edəcək. Təhsil pillələri ibtidai təhsil — 6 il (I–VI siniflər), baza təhsili — 3 il (VII–IX siniflər), orta təhsil — 2 il (X–XI siniflər) XII sinif könüllü olacaq. Şagird 11 sinfi bitirdikdən sonra tam ümumi təhsili təsdiq edən attestat alacaq. Könüllü XII sinfi başa vuranlar isə 12 illik tam ümumi təhsili təsdiq edən attestat əldə edəcəklər. Təhsil və Elm Nazirliyinin məlumatına görə, XII sinif əlavə akademik hazırlığını gücləndirmək istəyən şagirdlər üçün nəzərdə tutulur və bu sinifdə təhsil öncədən qeydiyyat əsasında təşkil olunacaq. Dəyişikliklərə əsasən, məktəb dərsliklərinə qrip verilməsi qaydası ləğv edilir. Bununla bağlı müddəalar “Ümumi təhsil haqqında” qanundan çıxarılır. Məktəblər tədrisi nazirlik tərəfindən hazırlanmış və ya nazirliklə razılaşdırılmış dərsliklər əsasında aparacaq. Nazirlik dərsliklərin hazırlanmasını, çapını və dövlət məktəblərinə şagirdlər üçün pulsuz, müvəqqəti istifadə məqsədilə çatdırılmasını təmin edəcək. Eyni zamanda dərsliklərin qiyməti, satışı, saxlanılması və dəyişdirilməsi qaydaları da nazirlik tərəfindən təsdiqlənəcək. Qanuna edilən dəyişikliklərə görə, ümumi təhsilin ibtidai pilləsində məktəbli forması məcburi olacaq. Formanın nümunəsi Təhsil və Elm Nazirliyi tərəfindən təsdiqlənəcək. Nazirlik həmçinin “Ümumi təhsil haqqında” qanunda nəzərdə tutulan məqsədlərin həyata keçirilməsi üçün sahibkarlıq və ya qeyri-kommersiya hüquqi şəxsi yaratmaq səlahiyyəti əldə edir. Qurumun açıqlamasına görə, bu addım ibtidai sinif şagirdlərinin məktəbli forması ilə təmin olunmasına imkan verəcək. Qanun layihəsində məktəblərdə şagirdlərin elektron kommunikasiya vasitələrindən, o cümlədən mobil telefonlardan istifadəsinin ümumi qaydalarının da Təhsil və Elm Nazirliyi tərəfindən müəyyən ediləcəyi qeyd olunub. Bundan əlavə, müəllim və təhsil müəssisəsinin digər əməkdaşları tərəfindən şagirdlərə qarşı zorakılıq halları ilə bağlı reaksiya mexanizmi dəyişdirilib. İndiki variantda zorakılığa görə işdən çıxarılan şəxslərin 3 il müddətinə ümumi təhsil müəssisələrində işləməsinin qadağan edilməsi nəzərdə tutulsa da, ikinci oxunuşda bu norma dəyişdirilib. Qərara əsasən, sözügedən məsələ qanunla deyil, nazirlik tərəfindən qanunaltı normativ aktla tənzimlənəcək.

www.24news.ge

Parlament bir sıra yenilikləri özündə cəmləşdirən məktəblərlə bağlı qanun layihəsini dəstəklədi

Digər xəbərlər