Gürcüstana səfər etmək istəyənlərin nəzərinə: 30 min lari Sığorta tələb olunacaq (VİDEO)

Gürcüstana səfər etmək istəyən xarici ölkə vətəndaşlarından 30 min lari Sığorta tələb olunacaq. 24News.ge xəbər verir ki, yanvarın 1-dən etibarən Gürcüstana daxil olan bütün xarici vətəndaşlar ölkədə qaldıqları müddət ərzində qüvvədə olan tibbi sığortaya malik olmalıdırlar. Qaydalar Gürcüstana turizm, işgüzar və ya tranzit məqsədilə daxil olan bütün xarici vətəndaşlara şamil olunur. Müəyyən edilmiş tələblərə əsasən, xarici vətəndaşlar ölkədə olduqları bütün müddət ərzində, yəni giriş tarixindən çıxış tarixinədək qüvvədə olan tibbi sığorta və bədbəxt hadisələrdən sığorta polisinə malik olmalıdırlar. Sığorta təminatının minimum məbləği 30 000 lari (GEL) təşkil etməlidir. Sığorta Gürcüstanın və ya xarici ölkələrin sığorta şirkətləri tərəfindən təqdim edilə bilər. Sənəd elektron və ya kağız formada təqdim olunmalı, gürcü və ya ingilis dilində tərtib edilməlidir. Sığorta aşağıdakı məlumatları özündə əks etdirməlidir: • Sığorta müqaviləsinin tərəfləri; • Sığorta müqaviləsinin qüvvədə olduğu ərazi; • Sığortanın predmeti; • Sığorta təminatının qüvvəyə minmə və bitmə tarixləri; • Sığorta riskləri; • Sığorta təminatının məbləği (limitlər); • Sığorta haqqının məbləği; • Ödənişin yeri və şərtləri. Yeni tələb Gürcüstanın "Turizm haqqında" Qanununa əsasən tətbiq edilir. Gürcüstan hökumətinin "Gürcüstana gələn turistlərin icbari sağlamlıq və bədbəxt hadisələrdən sığorta qaydaları və şərtlərinin təsdiq edilməsi haqqında" qərarı 1 yanvar 2026-cı il tarixində qüvvəyə minir.

www.24news.ge

Gürcüstana səfər etmək istəyənlərin nəzərinə: 30 min lari Sığorta tələb olunacaq (VİDEO)

Digər xəbərlər