Tbilisidə 762 qaçqın ailəyə mənzillər verilib (FOTO)

Tbilisinin yeni tikilmiş yaşayış kompleksində 762 qaçqın ailəyə mənzillər təqdim edilib. 24News.ge xəbər verir ki, bu barədə Qaçqınların, Əmək, Səhiyyə və Sosial Müdafiə Nazirliyi məlumat yayıb. Nazirliyin bildirdiyinə görə, Tvalçrelidze küçəsində tikilən müasir standartlara cavab verən yaşayış kompleksi 11 blokdan ibarətdir. Hazırda dörd blok tamamlanıb və mənzillər kompakt məskunlaşma binalarında yaşayan qaçqınlara təqdim olunub. Simvolik olaraq mənzillərin açarlarını yeni sakinlərə Baş nazir İrakli Kobaxidze, Okupasiya olunmuş ərazilərdən Qaçqınların, Əmək, Səhiyyə və Sosial Müdafiə naziri Mixail Sarjveladze və Tbilisi meri Kaxa Kaladze təqdim ediblər. Kompleksin tikintisi tam olaraq 2026-cı ildə başa çatacaq və ümumilikdə 2 426 qaçqın ailə yeni mənzillərlə təmin olunacaq. Layihənin büdcəsi 243 613 670 lari, tikinti və təmir işlərini isə “Anagi” şirkəti həyata keçirir. Layihəyə habelə xarici infrastrukturun təşkili də daxildir və bunun üçün büdcədən 11 860 000 lari ayrılıb. Kompleksin həyətində stadionlar, uşaq əyləncə meydançaları və idman sahələri nəzərdə tutulub. Tədbirdə qeyd olunub ki, qaçqın ailələrin layiqli yaşayış şəraiti ilə təmin edilməsi dövlətin prioritetlərindən biri olaraq qalır. Qeyd edək ki, cari il ərzində tam təmir olunmuş mənzillər artıq 1 614 qaçqın ailəyə təqdim olunub. Sentyabr ayında isə Kutaisidə, Nikea və Şervashidze küçələrində yerləşən müasir yaşayış komplekslərinə 852 ailə köçürülüb. Hazırda Tbilisinin paralelində yaşayış kompleksləri üç şəhərdə tikilir: Rustavida dörd blokda 800 qaçqın ailə üçün mənzillər hazırlanır. Zuqdididə yeddi blokdan ibarət kompleksdə 1 747 ailə yaşayışla təmin ediləcək. Borjomidə layihə 150 ailənin yerləşdirilməsini nəzərdə tutur. Hər üç layihə xarici infrastrukturu da əhatə edir. Bu genişmiqyaslı tikinti işləri başa çatdıqdan sonra ölkədə mövcud olan qaçqınların kompakt məskunlaşma obyektləri bağlanacaq və zorla köçürülmüş ailələr yeni mənzillərlə təmin olunacaq. Eyni zamanda, ölkə üzrə aktiv olaraq davam etdirilən “Kənddə ev” proqramı çərçivəsində qaçqın ailələr Gürcüstanın istənilən bölgəsində özləri ev seçə biləcək və dövlət həmin evin alınmasını təmin edəcək.

www.24news.ge

Tbilisidə 762 qaçqın ailəyə mənzillər verilib (FOTO)

Digər xəbərlər