4 oktyabrda keçiriləcək yerli seçkilərlə bağlı bir sıra qadağalar qüvvəyə minib

Bu gün ölkədə yerli özünüidarəetmə orqanlarına keçiriləcək seçkilərlə bağlı seçki qanunvericiliyinə əsasən bir sıra məhdudiyyətlər tətbiq edilir. 24News.ge xəbər verir ki, bu barədə Mərkəzi Seçki Komissiyası məlumat yayıb. Məlumata görə, səsvermə günü seçki məntəqəsində və onun yaxınlığında seçkiqabağı təşviqat aparmaq qadağandır. Qanunvericiliyə əsasən, seçki məntəqəsinin daxilində və girişindən 25 metr məsafədə hər hansı təşviqat materialının yerləşdirilməsi yolverilməzdir. Belə materiallar dərhal götürülməli və məntəqə ətrafı təşviqatdan təmizlənməlidir. Bundan başqa, seçicilərin hərəkətinə mane olmaq və ya səsvermə günü seçki məntəqəsindən 100 metr radiusda seçicilərin qeydiyyatını aparmaq, yaxud toplaşmaq da qadağan edilir. Səsvermə günü saat 08:00-da başlayacaq və 20:00-da başa çatacaq. Seçki məntəqələri isə səhər saat 06:45-dən etibarən açıq olacaq. Qanuna əsasən, məntəqənin bağlanma vaxtına qədər növbədə dayanan seçicilər səsvermədə iştirak etmək hüququna malikdir. Həmin şəxslərin siyahısı məntəqə seçki komissiyasının üzvləri tərəfindən tərtib ediləcək və qeydə alınacaq. Seçki günü saat 20:00-a qədər televiziya və radio efirlərində seçki subyektlərinin pulsuz və pullu reklamlarının yayımlanması, proqramlarının təqdim olunması, avtomatik telefon zəngləri və SMS-lərlə təşviqat kampaniyaları aparılması da qadağandır. Bundan əlavə, ictimai rəy sorğularının nəticələri də yalnız səsvermə başa çatdıqdan sonra – saat 20:00-dan etibarən dərc edilə bilər. İstisna olaraq, yalnız səsvermədə iştirak edənlərin və iştirak edə biləcək şəxslərin sayına dair məlumatlar öncədən açıqlana bilər. Seçki prosesinin şəffaflığını təmin etmək məqsədilə Mərkəzi Seçki Komissiyası müəyyən qaydalar tətbiq edib. Belə ki, səsvermə kabinələrində foto və video çəkiliş qadağandır. Lakin kabinədən kənarda – seçkiyə maneə törətməmək şərti ilə – MSK-nın müəyyən etdiyi qaydalar çərçivəsində çəkiliş aparıla bilər.

www.24news.ge

4 oktyabrda keçiriləcək yerli seçkilərlə bağlı bir sıra qadağalar qüvvəyə minib

Digər xəbərlər