Bu şəxslərə Gürcüstanı tərk etmək 16 il müddətinə qadağan ediləcək

Gürcüstanda maliyyə və iqtisadi xarakterli ağır cinayətlərə görə məhkum olunmuş şəxslərin ölkəni tərk etməsinə 16 il müddətinə qadağa qoyulacaq. 24News.ge xəbər verir ki, bu barədə dəyişikliklər “Gürcü Arzusu” partiyasının təşəbbüsü ilə hazırlanmış qanunvericilik paketində əks olunub. Paket parlament tərəfindən üçüncü və sonuncu oxunuşda qəbul edilib. Yeni qanuna əsasən, böyük məbləğdə dələduzluq, mənimsəmə, əmlakın israfı, kompüter fırıldaqları və vəzifə səlahiyyətlərindən sui-istifadə kimi cinayətlərə görə məhkum edilmiş şəxslər, zərəri ödəmədikləri halda, 16 il ərzində Gürcüstanı tərk edə bilməyəcəklər. Yeni tənzimləmələrə əsasən, belə şəxslərə elektron qolbaq taxılması, eləcə də özlərinin və ailə üzvlərinin əmlakının müsadirəsi tətbiq edilə bilər. Əgər məhkum edilmiş şəxs zərərçəkmişə kompensasiyanı ödəməzsə, yaşayış minimumunun ikiqatından artıq gəlir əldə etməsi qanunla qadağan olunur. Bundan başqa, belə şəxslərə pul və ya əmlak verilməsi də yeni cinayət hesab ediləcək və bu əməllər üçün 3 ildən 5 ilədək azadlıqdan məhrumetmə cəzası nəzərdə tutulur. Qanunun keçid müddəalarına görə, dəyişikliklər hazırda istintaq və ya məhkəmə mərhələsində olan işlərə də tətbiq ediləcək. Əgər cinayət qanunun qüvvəyə minməsindən əvvəl törədilibsə, lakin istintaq başlamayıbsa, həmin şəxslərə də zərərin ödənilməsi və ölkədən çıxışa qadağa tədbirləri tətbiq olunacaq. Hüquqi məsələlər üzrə komitə sədri Arçil Qorduladzenin sözlərinə görə, yeni qanunun əsas prinsipi cinayətin kateqoriyası deyil, vurulan zərərin miqdarıdır. Cinayət yüngül olsa belə, əgər zərər böyükdürsə, maksimal tədbirlər tətbiq olunacaq.

www.24news.ge

Bu şəxslərə Gürcüstanı tərk etmək 16 il müddətinə qadağan ediləcək

Digər xəbərlər