Dmanisidə müxtəlif mərkəzlərin müdavimlərinin iştirakı ilə keçirilən “Yay Düşərgəsi” başa çatıb (VİDEO)

Diasporla İş üzrə Dövlət Komitəsinin layihələri çərçivəsində Dmanisi bələdiyyəsinin Pantiani (Armudlu) kəndində təşkil olunan “Yay Düşərgəsi” başa çatıb. 24News.ge xəbər verir ki, avqustun 25-dən 28-dək davam edən düşərgə “Dmanisi Tədris Mərkəzi”nin təşkilatçılığı ilə keçirilib. Düşərgədə Marneuli, Rustavi şəhərləri və Laqodexi, Bolnisi, Qardabani, Saqareco, Dmanisi rayonlarında fəaliyyət göstərən mərkəzlərin 25 müdavimi iştirak edib. Tədbirin ikinci günü iştirakçılar Dmanisi Tarix Muzeyinə ekskursiya edərək rayonun tarixilə tanış olublar. Daha sonra Dmanisi Milli Parkında əyləncə proqramı keçirilib. Düşərgənin üçüncü günü gənclər Borçalı aşıq məktəbinin nümayəndəsi, aşıq Kamandar Qurbanovla görüşüblər. Aşıq Kamandar Azərbaycan aşıq sənətinin qədim köklərə malik olduğunu vurğulayıb və bu sənətin tarix boyu xalqın yaddaşını qoruyan mühüm vasitə kimi çıxış etdiyini bildirib. Gənclər həmçinin Dmanisi Sionisi — VI əsrə aid üç kilsəli bazilika tipli gürcü memarlıq abidəsini ziyarət ediblər. Abidə 2006-cı ildən Gürcüstanın ölkə əhəmiyyətli daşınmaz mədəniyyət abidəsi statusunu daşıyır. Ziyarət zamanı iştirakçılar qədim məişət əşyaları və arxeoloji tapıntılarla tanış olublar. Düşərgə çərçivəsində “Qanun” hüquqi yardım mərkəzinin vəkili Əli Bədirov “Gürcüstan qanunları və Konstitusiyası” mövzusunda mühazirə ilə çıxış edib. O, Gürcüstanda nikah yaşı ilə bağlı qanunvericiliyə edilən dəyişikliklər barədə məlumat verib. Bildirilib ki, ölkədə nikah yaşı 18 olaraq müəyyən edilib və 18 yaşa çatmayan şəxslərlə bağlanan nikahlar erkən nikah hesab olunur və qanunla cəzalandırılır. Sonda iştirakçılara düşərgədəki fəallıqlarına görə sertifikatlar təqdim olunub.

www.24news.ge

Dmanisidə müxtəlif mərkəzlərin müdavimlərinin iştirakı ilə keçirilən “Yay Düşərgəsi” başa çatıb (VİDEO)

Digər xəbərlər