Avropa Parlamenti Gürcüstanla bağlı sərt qətnamə qəbul etdi

Avropa Parlamenti müzakirələrdən sonra Gürcüstanla bağlı sərt məzmunlu qətnamə qəbul edib. 24News.ge xəbər verir ki, qətnamənin lehinə 490, əleyhinə isə 147 səs verilib. Qətnamədə ölkədəki demokratik geriləmə, siyasi təzyiqlər və insan hüquqlarının pozulması ilə bağlı ciddi narahatlıqlar əksini tapıb. Sənəddə Avropa Parlamenti Gürcü xalqına həmrəyliyini bir daha ifadə edir və onların Avropa və Avro-Atlantik inteqrasiya arzularına sarsılmaz dəstəyini bildirir. Qeyd olunur ki, bu istəklər hökumətin repressiyalarına baxmayaraq davam edən kütləvi etiraz aksiyalarında özünü göstərir. Qətnamədə Gürcüstan hakimiyyətinin zorakılıq tətbiq etməsi, siyasi motivli həbslər, dinc etirazçılara və müxaliflərə qarşı sistemli təzyiqlər sərt şəkildə pislənir. Avropa Parlamenti hökuməti toplaşmaq və ifadə azadlığına hörmət etməyə, repressiv qanunvericiliyi ləğv etməyə və bütün siyasi məhbusları dərhal və qeyd-şərtsiz azad etməyə çağırır. Sənəddə qeyd olunur ki, “Gürcü Arzusu” partiyası Gürcüstanın namizəd ölkə kimi Avropa inteqrasiyasında irəliləməsi üçün yaranmış tarixi fürsəti boşa verib. Avropa Parlamenti bildirir ki, 2024-cü ilin oktyabrında keçirilmiş saxtalaşdırılmış parlament seçkiləri Gürcüstanda avtoritar rejimə doğru dönüş nöqtəsi olub. Qətnamədə həmçinin “Gürcü Arzusu”nun qurduğu “özünü elan etmiş hakimiyyət” tanınmır və Gürcüstan bu rejim tərəfindən ələ keçirilmiş dövlət hesab olunur. Parlament Bidzina İvanişviliyə, onun ailəsinə və şirkətlərinə qarşı fərdi sanksiyaların tətbiqini və maliyyə aktivlərinin dondurulmasını tələb edir. Avropa Parlamenti ölkədəki siyasi və konstitusiya böhranının yalnız yeni parlament seçkiləri vasitəsilə həll oluna biləcəyini bildirir. Bu seçkilərin azad, ədalətli və şəffaf şəraitdə – müstəqil seçki administrasiyası və beynəlxalq müşahidəçilərin nəzarəti ilə keçirilməsi vacib sayılır. Qətnamədə həmçinin Gürcüstanın Avropa İttifaqının xarici və təhlükəsizlik siyasətinə uyğunluq səviyyəsinin aşağı olduğu – cəmi 49% təşkil etdiyi və bu durumun ölkəni beynəlxalq təcridə sürüklədiyi vurğulanır. Avropa Parlamenti “Gürcü Arzusu”nu demokratik islahatlar və Avro-Atlantik inteqrasiya yoluna qayıtmağa çağırır və əks halda Gürcüstanın Aİ-yə gedən yolunun təhlükə altında qalacağını bildirir.

www.24news.ge

Avropa Parlamenti Gürcüstanla bağlı sərt qətnamə qəbul etdi

Digər xəbərlər