“Lelo – Güclü Gürcüstan” partiyası yerli seçkilərdə iştirak edəcəyini açıqladı

“Lelo – Güclü Gürcüstan” partiyası yerli özünüidarəetmə seçkilərində iştirak edəcəyini elan edib. 24News.ge xəbər verir ki, bu barədə partiyanın ofisində keçirilən xüsusi brifinqdə məlumat verilib. Partiyanın baş katibi İrakli Kupradze bildirib ki, partiya “rus rejiminə qarşı mübarizənin yeni cəbhəsində” fəal iştirak edəcək. Onun sözlərinə görə, “Güclü Gürcüstan” koalisiyası mübarizəyə Gürcüstan vətəndaşlarının hüquqları, gənclərin gələcəyi və yaşlıların rifahı naminə qoşulur: “Biz diktatura və rus rejiminə qarşı mübarizənin daha bir əsas cəbhəsinə daxil oluruq. Avropayönlü müxalifətə müraciət edirik: məqsədimiz ortaqdır – rus rejiminə son qoymaq,” – deyə Kupradze bəyan edib. O, partiyanın seçkiləri sadəcə yerli seçki kimi qiymətləndirmədiyini, 4 oktyabr tarixini “de-fakto hakimiyyətə qarşı ümumxalq mübarizəsinin günü” kimi dəyərləndirdiyini bildirib: “Bu, Gürcüstan vətəndaşlarının rejimə qarşı fərdi mübarizəsidir. Biz nə Tbilisidə, nə də regionlarda azadlıqdan imtina etməyəcəyik. Mübarizə sonadək davam edəcək,” – deyə o vurğulayıb. Kupradze həmçinin qeyd edib ki, partiya “total müqavimətə” və repressiyalara hazırdır. Hazırda partiyanın liderləri Mamuka Xazaradze və Badri Japaridze, eləcə də fəallar Vepxia Kasradze və Vasil Kadzelaşvili həbsdədir. “Lelo – Güclü Gürcüstan” partiyası avropayönlü müxalifət qüvvələrini birlikdə mübarizə aparmağa çağırıb və koalisiya əməkdaşlığına açıq olduğunu bəyan edib.

www.24news.ge

“Lelo – Güclü Gürcüstan” partiyası yerli seçkilərdə iştirak edəcəyini açıqladı

Digər xəbərlər