Gürcü ekspert son günlər Rusiya ilə Azərbaycan arasında artan gərginliyi şərh edib

Ekspert-analitik Zurab Batiaşvili son günlər Rusiya ilə Azərbaycan arasında artan gərginliyi şərh edib. 24News.ge xəbər verir ki, o, sosial şəbəkə hesabında verdiyi açıqlamada bildirib ki, iki ölkə arasında bu qədər sərt münasibət indiyə qədər müşahidə olunmayıb. Ekspertin fikrincə, gərginliyin əsas səbəbi Rusiyanın Yekaterinburq şəhərində yaşayan azərbaycanlı ailələrin evlərinə hüquq-mühafizə orqanlarının keçirdiyi əməliyyat olub. Bu əməliyyatın guya 24 il əvvəl baş vermiş bir qətllə bağlı aparıldığı bildirilir. Əməliyyat nəticəsində iki etnik azərbaycanlının həlak olduğu və bu faktın Azərbaycanda ciddi narazılıq doğurduğu qeyd olunur. Batiaşvili qeyd edib ki, bu ailələrin Qarabağ müharibəsi zamanı məcburi köçkünə çevrilməsi və Rusiyanın təzyiqlərinə baxmayaraq, Ukraynadakı müharibədə iştirakdan imtina etməsi vəziyyəti daha da gərginləşdirib. Ekspert əlavə edib ki, Yekaterinburq insidentindən əvvəl də Rusiya ilə Azərbaycan arasında münasibətlərdə gərginlik yaşanıb. Belə ki, Groznı üzərində Azərbaycan sərnişin təyyarəsinin atəşə tutulması və qəzaya uğraması nəticəsində çoxsaylı günahsız azərbaycanlının həyatını itirməsi, Moskvadan rəsmi üzrün gəlməməsi fonunda Prezident İlham Əliyevin 9 mayda Rusiya paytaxtında keçirilən paradda iştirak etməməsi Moskvanın narazılığına səbəb olub. O bildirib ki, hadisələrdən sonra Azərbaycan tərəfi Rusiya ilə bir sıra əməkdaşlıq sahələrini dondurub. Rusiya nümayəndə heyətinin ölkəyə səfəri rədd edilib, rus müğənnilərinin Bakıda nəzərdə tutulan konsertləri ləğv olunub və "Sputnik Azərbaycan" informasiya agentliyinin rəhbər şəxsləri saxlanılıb. Batiaşvili bu şəxsləri Rusiya Federal Təhlükəsizlik Xidmətinin (FSB) agentləri adlandıraraq onların açıq şəkildə həbs olunmasının vəziyyətin nə qədər ciddi olduğunu göstərdiyini deyib. Ekspert hesab edir ki, bu gərginliyin yaxın zamanda səngiməsi ehtimalı azdır: “Rusiya Azərbaycana əlavə problemlər yaratmağa çalışacaq. Lakin Ukraynadakı müharibə səbəbilə resursları məhduddur və ikinci cəbhə açmaqda çətinlik çəkəcək”, - deyə ekspert vurğulayıb. Batiaşvili həmçinin Moskvanın Ermənistanla münasibətlərinin də zəiflədiyini vurğulayaraq, Rusiyanın eyni vaxtda həm Azərbaycan, həm də Ermənistanla münasibətlərini pozmasının Kremlin siyasi strategiyasının uğursuzluğuna işarə etdiyini bildirib. Ekspert gərginliyin dərin səbəblərindən birini də Moskvanın postsovet ölkələrinin, o cümlədən Azərbaycanın müstəqil siyasət aparmasına qarşı olması ilə izah edib. O, 4 iyulda Türkiyə Prezidenti Rəcəb Tayyib Ərdoğanın Azərbaycana gözlənilən səfərinə də toxunaraq qeyd edib ki, Türkiyə ilə Azərbaycan arasında hərbi əməkdaşlığı nəzərdə tutan “Şuşa Bəyannaməsi” bu vəziyyətdə xüsusi əhəmiyyət kəsb edir. Batiaşvili vurğulayıb ki, 2020-ci ildə Qarabağ müharibəsi zamanı Gəncə aerodromunda iki türk F-16 qırıcısının növbə çəkməsi Rusiyaya qarşı balans yaratmaq məqsədi daşıyırdı və bu dəfə də Türkiyənin Azərbaycanın yanında olacağı ehtimalı yüksəkdir. Sonda ekspert həmçinin onu da bildirib ki, Rusiyanın Ermənistan və Azərbaycanla münasibətlərində gərginliyin artması fonunda rusların "Gürcü Arzusu"na Bakı və ya İrəvanla ikitərəfli münasibətləri pozmaq tapşırığı verməsi heç də təəccüblü olmaz: "Məsələn, rusların göstərişi ilə 'Gürcü Arzusu' Bakıya və ya İrəvana Qara dənizə, Türkiyəyə, ümumiyyətlə Qərbə çıxış imkanını bağlaya və ya çətinləşdirə, yaxud da müxtəlif iddialarla çıxış edə bilərlər. Məsələn, rusların əvvəllər ortaya atdığı 'Qareci Gürcüstandır!' məsələsini yenidən gündəmə gətirə bilərlər və s. Aydındır ki, Bakı ilə bunu etmək onlara daha çətin olacaq, lakin 'Gürcü Arzusu'nun indiyə qədər etdiyi çılğınlıqları nəzərə alsaq, onların belə bir tapşırığın icrasına girişməsi də təəccüblü olmaz. Axı Rusiya qulluğu onların əmrlərinin qeyd-şərtsiz yerinə yetirilməsini də ehtiva edir. Əgər bu baş verərsə, bu, onların sonunun başlanğıcına da çevrilə bilər" , - deyə Zurab Batiaşvili qeyd edib.

www.24news.ge

Gürcü ekspert son günlər Rusiya ilə Azərbaycan arasında artan gərginliyi şərh edib

Digər xəbərlər