SON DƏQİQƏ: İrakli Qaribaşili “Gürcü Arzusu”nu tərk etdiyini açıqladı

“Gürcü Arzusu”nun sədri İrakli Qaribaşıli partiyanı tərk edir. 24News.ge xəbər verir ki, Qaribaşvili bu barədə partiyanın ofisində keçirdiyi brifinqdə açıqlama verib. O bildirib ki, partiya ilə yanaşı siyasəti də tərk edir. Qaribaşvili bu qərarını ölkədə yaranmış siyasi şərait, həmçinin son vaxtlar onun gələcək fəaliyyətinə dair yayılan spekulyasiyalarla əlaqələndirib: “Siyasətdən getmək qərarımla bağlı məlumat vermək istəyirəm. Son bir neçə həftədir ki, gələcək siyasi fəaliyyətimlə bağlı spekulyasiyalar səngimir. Buna görə də mən özümü ictimaiyyət qarşısında mövcud suallara hərtərəfli cavab verməyə borclu hesab edirəm. İndiyə qədər siyasi həyatımda atdığım hər bir addım konkret məqsədə – ölkəmizə, xalqımıza xidmət etmək, dövlətimizi gücləndirmək olub”. O qeyd edib ki, “Gürcü Arzusu” bu gün vahid və güclü siyasi qüvvə kimi fəaliyyət göstərir. Bu uğurun əldə olunmasında isə partiyanın qurucusu və fəxri sədri Bidzina İvanişvilinin xüsusi rolu olduğunu vurğulayıb. Qaribaşvili bildirib ki, partiya rəhbərliyi tərəfindən ona verilən etimad – əvvəlcə müdafiə naziri, daha sonra ikinci dəfə baş nazir və partiya sədri təyin olunması – onun üçün şərəfli missiya olub. Onun sözlərinə görə, bu missiya artıq yerinə yetirilib: “İndi mən daha partiya sədri kimi və ümumiyyətlə siyasətdə qalmağa ehtiyac görmürəm. Ona görə də mən ‘Gürcü Arzusu’nun sədri postunu tərk edib siyasətdən getməyə qərar verdim. Eyni zamanda, başqa bir vəzifədən ölkəmə xidmət etməyə davam edə bilərəm”, – deyə Qaribaşvili bəyan edib. Qeyd edək ki, İrakli Qaribaşvili 2012-ci ildə partiya yaranandan bəri “Gürcü Arzusu”nun fəaliyyətində iştirak edib, iki dəfə həm baş nazir, həm də partiya sədri vəzifələrində çalışıb.

www.24news.ge

SON DƏQİQƏ: İrakli Qaribaşili “Gürcü Arzusu”nu tərk etdiyini açıqladı

Digər xəbərlər