Kobaxidze: "Yaxın 4 ildə ölkə iqtisadiyyatı 40 milyard lari artacaq"

"Proqramımıza uyğun olaraq, yaxın 4 ildə ölkə iqtisadiyyatı 40 milyard lari artacaq, bu isə o deməkdir ki, biz keyfiyyətcə fərqli inkişaf səviyyəsinə keçəcəyik". 24News.ge xəbər verir ki, bu barədə baş nazirin səlahiyyətlərini icra edən İrakli Kobaxidze deyib. O bildirib ki, ölkənin iqtisadi tərəqqisinə qayğı bundan sonra da davam etdiriləcək və bu məqsədlə konkret proqram təqdim olunub: “Müxalifətin ölkə iqtisadiyyatının çökməsi arzuları var, lakin Beynəlxalq Valyuta Fondunun proqnozları var ki, biz 5 il ərzində iqtisadi artıma görə dünyada ikinci yeri tuturuq. Birinci yerdə neft yataqları olan ölkə dayanır, biz isə ikinci sıradayıq. Əgər son üç ilin və bu ilin göstəricilərini nəzərə alsaq, iqtisadi artım baxımından geniş regionda və Avropada birinci yerdəyik. Müxalifət əvvəllər də iddia edirdi ki, hər şey pis olacaq, ölkə və iqtisadiyyat çökməyə məruz qalacaq. Amma biz ötən üç il ərzində və bu il Avropada və geniş regionda iqtisadi artım baxımından birinci yeri tuta bildik. Bu ilin artımı ötən ildən yüksəkdir və bu, çox yaxşı göstəricidir. Bu tendensiyanı asanlıqla qoruyub saxlaya bilərik, xüsusilə də iqtisadi inkişafı dəstəkləyəcək çox konkret layihələrimiz var. Bunlara əlaqələndirmə funksiyasının gücləndirilməsi ilə bağlı layihələr daxildir. Məsələn, avtomagistralın tikintisinin tamamlanması, Anaklia layihəsi, Qara dəniz altından keçən kabel layihəsi, Tbilisi və Kutaisi hava limanları ilə bağlı layihələr və s. Bunlar çox iddialı proqramlardır. Sabah bu barədə daha ətraflı danışacağıq”, - deyə İrakli Kobaxidze vurğulayıb. Onun sözlərinə görə, hökumət proqramı çərçivəsində nəzərdə tutulan məhz bu proqram və layihələr yalnız tendensiyanın qorunub saxlanmasını deyil, həm də iqtisadi inkişafın daha sürətli templə irəliləməsini təmin edəcək.

www.24news.ge

Kobaxidze: "Yaxın 4 ildə ölkə iqtisadiyyatı 40 milyard lari artacaq"

Digər xəbərlər