14 dekabr tarixində Gürcüstanda prezident seçkiləri hansı qaydada keçiriləcək?

Gürcüstan Mərkəzi Seçki Komissiyası ölkədə prezident seçilməsi proseduru barədə məlumat yayıb. 24News.ge xəbər verir ki, məlumatda prezident seçkiləri 2024-cü il dekabrın 14-də keçiriləcəyi bildirilir. Qeyd olunur ki, bu il ilk dəfə olaraq Gürcüstanda prezident seçkiləri yeni sistemlə keçiriləcək. Prezidenti birbaşa qaydada vətəndaşlar deyil, 300 nəfərdən ibarət seçki kollegiyası seçəcək. Sözügedən 300 nəfərdən 150 nəfəri parlamentdə mandat qazanmış deputatlardan, 150 nəfəri isə yerli özünüidarəetmə (bələdiyyə) orqanlarının nümayəndələrindən ibarət olacaq. Qeyd edilən üzvlərin 150 nəfəri parlamentin deputatı, 20 nəfəri Abxaziya Muxtar Respublikasının, 20 nəfəri Acarıstan Muxtar Respublikasının ali nümayəndəlik orqanın üzvü, 109 nəfəri isə Gürcüstan Mərkəzi Seçki Komissiyasının üzvi qanun əsasında müəyyən etdiyi kvotalara uyğun olaraq yerli özünüidarəetmənin nümayəndəlik orqanlarından müvafiq siyasi partiyalar tərəfindən irəli sürüləcək şəxslərdən ibarət olacaq. Prezident seçkiləri dekabrın 14-də saat 09:00-da, Gürcüstan parlamentinin binasında başlayacaq. Seçici kollegiyasının ən azı 30 üzvü Gürcüstan prezidentliyinə namizəd irəli sürmək hüququna malikdir. Seçkilərin birinci turunda seçki kollegiyasının tam tərkibinin ən azı üçdə ikisinin səsini toplayan namizəd seçilmiş hesab ediləcək. Gürcüstan prezidenti birinci turda seçilməsə, ikinci tur həmin gün keçiriləcək və ən çox səs toplayan namizəd seçilmiş hesab olunacaq. Məlumat üçün onu da bildirək ki, 300 nəfərdən ibarət seçki kollegiyasının tərkibində "Gürcü arzusu" partiyası 156 nəfərlə üstünlüyə malikdir ki, bu da hakim partiyanın təkbaşına prezidenti seçmək imkanının olacağından xəbər verir. Parlament seçkilərinin legitimliyini tanımayan müxalifət partiyalarının prezident seçkilərində iştirak etməyəcəyi ehtimal edilir.

www.24news.ge

14 dekabr tarixində Gürcüstanda prezident seçkiləri hansı qaydada keçiriləcək?

Digər xəbərlər