Səfir Tbilisidə şəhid ailələri ilə görüşündə Gürcüstanın Milli Qəhrəmanı Ənvər Hümbətovun qəhramanlığından danışıb

Gürcüstanda yaşayan Azərbaycanlıların Gürcüstanın suverenliyinin qorunmasında müstəsna xidmətləri olub. Buna misal olaraq, Abxaziya müharibəsi iştirakçısı, döyüş meydanında qəhramanlıq göstərən Ənvər Hümbətovu göstərmək olar. 24News.ge xəbər verir ki, bu sözləri Azərbaycanın Gürcüstandakı səfiri Faiq Quliyev, Azərbaycanın Dini Qurumlarla İş üzrə Dövlət Komitəsinin və Azərbaycanın Gürcüstandakı səfirliyinin birgə təşkilatçılığı ilə Tbilisidə şəhid ailələri ilə keçirilən görüşdə deyib. O qeyd edib ki, Abxaziya müharibəsi zamanı döyüş meydanında göstərdiyi igidliyə və cəsurluğa görə "Vaxtanq Qorqasali" ordeni ilə təltif olunan leytenant Ənvər Hümbətov, Gürcüstan azərbaycanlılarının ölkələrinin ərazi bütövlüyü uğurunda canlarından belə keçməyə hazır olduqlarının bariz nümunəsidir. Səfir bildirib ki, Ə.Hümbətov könüllü olaraq Abxaziya müharibəsində iştirak edib. O, 1993-cü ildə hərbi tapşırığı uğurla yerinə yetirib, geri dönərkən pusquya düşərək mühasirədə qalan dəstəni özünü fəda edərək xilas edib. Ə.Hümbətovun bu fədəkarlığı sayəsində 25-30 nəfər ölümdən xilas olub. Faiq Quliyev Ənvər Hümbətovun xanımı Fatma Hümbətovanın tədbirdə iştirak etməsini xüsusi qeyd edib və onlara dəvəti qəbul edib gəldikləri üçün təşəkkür edib. Məlumat üçün bildirək ki, Ənvər Oruc oğlu Hümbətov 1950-ci ilin yanvarın 1-də Marneulinin Algeti (Gorarxı) kəndində anadan olub. 1992-ci ilin sonlarında Abxaz separatçılarının Gürcüstanda fəallaşmasından sonra o, Rustavi hərbi komissarlığına müraciət edərək, könüllü hərbi xidmətə yollanıb. Ə.Hümbətov döyüşlərin ən qızğın olduğu- Tkvarçeli, Labra və Şroma kimi bölgələrdə döyüşüb. 1993-cü ilin iyul ayının 4-də hərbi tapşırığı uğurla yerinə yetirib, geri dönərkən pusquya düşərək, mühasirədə qalan dəstəni özünü fəda edərək xilas edib. Ə. Hümbətov 30 dekabr 1994-cü ildə ölümündən sonra Gürcüstanın dövlət mükafatı – "Vaxtanq Qorqasali'' ordeninə layiq görülüb.

www.24news.ge

Səfir Tbilisidə şəhid ailələri ilə görüşündə Gürcüstanın Milli Qəhrəmanı Ənvər Hümbətovun qəhramanlığından danışıb

Digər xəbərlər