Haqqımızda Reklam
18 
Sen
2023
16:58
37
2
841

DTX-nın yaydığı bəyanat müxalifətin tənqidinə səbəb olub

Dövlət Təhlükəsizlik Xidmətinin oktyabr-dekabr aylarında ölkədə güc yolu ilə hakimiyyəti dəyişdirməyə cəhd ediləcəyi barədə bəyanatı müxalifətin tənqidinə səbəb olub. 24News.ge xəbər verir ki, müxalif liderlər sözügedən bəyanatların Gürcüstan dövlət qurumlarının necə bir təsir altında olduqlarını bir daha təsdiqlədiyini bildiriblər. "Vahid Milli Hərəkat" partiyasının lideri Levan Xabeişvilinin sözlərinə görə, sözügedən bəyanatla DTX Rusiya Federal Təhlükəsizlik Xidmətinin Gürcüstanın dövlət qurumları üzərində olan təsirini üzə çıxarıb: “Partsxaladzeni, "siravi" birini xilas etmək üçün rus kəşfiyyatçıları hərəkətə keçiblər. Bununla təsdiqlədilər ki, Dövlət Təhlükəsizlik Xidməti Partsxaladzenin, yəni Rusiya FSB-nin təsiri altındadır. Bu bəyanatla aydın olur ki, casusların dairəsi hər kəsin təsəvvür etdiyindən qat-qat böyükdür”. "Ağmaşenebeli Strategiya" partiyasının lideri Qiorqi Vaşadze hesab edir ki, bu günkü bəyanatla təkcə prokurorluq və maliyyə polisinin deyil, həm də Dövlət Təhlükəsizlik Xidmətinin Partsxaladzenin nəzarəti altında olduğu təstiq olunur: “İctimaiyyət Rusiyanın casus şəbəkəsinin ifşa olunmasını gözləyir. Partsxaladze Rusiyanın casusluq planını idarə etdiyinə görə ABŞ tərəfindən sanksiyaya məruz qalıb. Belə bir hadisələr fonunda DTX bu cür cəfəngiyyat yayır ki, bunun da yeganə məqsədi Gürcüstanda Rusiya casus şəbəkəsinin fəaliyyət göstərməsindən başqa hər şeydən danışmaqdır. Bütün bunlar ona görə baş verir ki, bu gün Dövlət Təhlükəsizlik Xidməti Partsxaladze və Rusiyanın sifarişlərini yerinə yetirir. Bu adamlar bizə ukraynalıların tərəfində Rusiyaya qarşı vuruşan Qia Lortkipanidzeni Gürcüstanın düşməni, Partsxaladzeni isə ölkənin dostu kimi təqdim etmək istəyirlər. Bu gün bütün iş Rusiyanın casus şəbəkəsini ifşa etmək, Partsxaladze ilə əlaqəli olan bütün şəxsləri oradan uzaqlaşdırmaq, Gürcüstanın İttifaqa tamhüquqlu üzv olması üçün Avropa İttifaqının tövsiyələrini yerinə yetirmək üzərində olmalı olduğu halda, onlar Gürcüstanın dövlət maraqları ilə mübarizə aparırlar. Onlar gürcü xalqına qarşı vuruşur, absurdlar uydurur, nağıllar uydururlar ki, Gürcüstanı əvvəldən axıra kimi Rusiyaya tabe etsinlər”. Məlumat üçün bildirək ki, Dövlət Təhlükəsizlik Xidməti Gürcüstan ərazisində və onun hüdudlarından kənarda fəaliyyət göstərən şəxslərin cari ilin oktyabr-dekabr aylarında Gürcüstanda sabitliyin pozulması və vətəndaş iğtişaşları təşkil etməyi planlaşdırdığını, bunun da son məqsədinin hakimiyyəti güc yolu ilə dəyişməkdən ibarət olduğunu bildirib.

www.24news.ge

(Şahidi olduğunuz hadisələri çəkib bizə göndərin!) 571798989