Baş nazir paradda deyib: "Daxili və xarici düşmənlərin dağıdıcı cəhdlərinə baxmayaraq, Gürcüstan regionda sabitlik rəmzinə çevirilib"

"Azadlığın ilk düşməni müharibədir. Bu gün qardaş Ukrayna, Rusiyanın başladığı amansız müharibədə öz azadlığını qorumaq üçün çox böyük fədakarlıqlar göstərir. Mən bir daha Ukraynaya və Ukrayna xalqına dəstəyimi bildirirəm, müharibənin tezliklə bitməsini, sülh, barışıq və azadlıq arzulayıram”. 24News.ge xəbər verir ki, bu sözləri Baş nazir İrakli Qaribaşvili Tbilisidə Müstəqillik Günü münasibətilə keçirilən paradda çıxışı zamanı deyib. Baş nazirin sözlərinə görə, hökumətin əsas məsuliyyəti və öhdəliyi sülhü qorumaq və möhkəmləndirmək, öz xalqını qorumaq və ölkəni xilas etməkdir: “Əziz dostlar, nüvə müharibəsi təhlükəsinin tarixdə ən kəskin olduğu bu gün bizim əsas məsuliyyətimiz və borcumuz sülhü qorumaq və möhkəmləndirmək, xalqımızı qorumaq və ölkəmizi xilas etməkdir. Hökumətin sülh siyasəti nəticəsində bədxahların, daxili və xarici düşmənlərin çoxsaylı dağıdıcı cəhdlərinə baxmayaraq, Gürcüstan regionda sülh və sabitlik rəmzi olaraq qalır. Biz müharibənin və sülhün qiymətini çox yaxşı bilirik. Nə qədər ki, ölkəmizə, xalqımıza kiçik də olsa təhlükə var, biz bu öhdəliyi yerinə yetirməkdən əl çəkməyəcəyik”. Qaribaşvili həmçinin qeyd edib ki, ölkənin namizəd statusu alması üçün səylərimizi əsirgəməyəcəyik - hakimiyyət və gürcü xalqı Avropadan yeganə düzgün və ədalətli qərar gözləyir: Avrointeqrasiya yolunda bizim uğurlarımız xüsusilə təsir edicidir; Mən fəxr edirəm ki, baş nazir olduğum müddətdə Avropa İttifaqı ilə Assosiasiya Sazişi imzalamaq şərəfinə nail olmuşam. Bu razılaşma nəticəsində Gürcüstan bu gün Avropa İttifaqı ilə azad ticarət və vizasız gediş-gəlişdən istifadə edir. Keçən il biz Avropa İttifaqına üzv olmaq üçün müraciət etdik və Avropa İttifaqından Avropa perspektivi aldıq, bu, həqiqətən də tarixi qərar idi. Bütün bunlar hökumətimizin son on ildə gördüyü işlərin nəticəsidir, bizim nailiyyətimizdir, lakin biz bundan sonra da səylərimizi əsirgəməyəcəyik ki, ölkəmiz ilin sonunda namizəd statusu alsın, bu da bizim üçün avrointeqrasiya yolunda başlanğıc olacaq. Bugünkü ən çətin geosiyasi vəziyyətdə biz gürcü hökuməti və gürcü xalqı Avropadan yeganə düzgün və ədalətli qərar, Gürcüstanın çoxəsrlik istəklərinin tanınmasını, hökumətimizin və xalqımızın birgə səyini - namizəd statusunun verilməsini gözləyirik. Bizim xidmətlərimizin Avropa tərəfindən ədalətli şəkildə tanınması ölkədə qütbləşmənin aradan qaldırılmasına, sülhün və sabitliyin möhkəmlənməsinə, ölkəmizin gələcək tərəqqisinə töhfə verəcək tarixi addım olacaq”, - deyə İrakli Qaribaşvili vurğulayıb.

www.24news.ge

Baş nazir paradda deyib: "Daxili və xarici düşmənlərin dağıdıcı cəhdlərinə baxmayaraq, Gürcüstan regionda sabitlik rəmzinə çevirilib"

Digər xəbərlər