Avropa Parlamenti Gürcüstan hökumətini bir sıra məsələlərlə bağlı ciddi tənqid edib

Avropa Parlamentində "Gürcüstanda media azadlığının və jurnalistlərin təhlükəsizliyinin pozulması" başlığı ilə aparılan müzakirələrdə ölkədəki vəziyyət ciddi tənqid olunub. 24News.ge xəbər verir ki, debatlarda Mixeil Saakaşvilinin və Nika Qvaramiyanın həbsinə də diqqət çəkilib. Debatlar zamanı Avropa Parlamentinin Almaniyalı deputatı Viola fon Kramon bildirib ki, "Gürcüstanda jurnalistləri qorumaq əvəzinə, onlara hücum edilir: "Nika Qvaramiya ilə bağlı cinayət işi qanunun aliliyinin pozulmasının çox bariz nümunəsidir, lakin bu, yeganə hal deyil. Biz bu ölkənin böyük dostlarıyıq və bu cür hadisələrin nümunələrini görmək istəmirik", - deyə Kramon qeyd edib. Avropa Parlamentinin digər deputatı Andrius Kubilius isə deyib: "Media azadlığı Gürcüstanın rəsmi və kölgə rəhbərliyinin məhkəmə sistemini siyasiləşdirməyə yönəlmiş siyasətinin qurbanıdır. Bu, tamamilə qəbuledilməzdir. Bu, post-kommunist ölkələrinin oxşar vəziyyətə düşməsi ilk dəfə deyil. Slovakiya 1997-ci ildə danışıqlara başlamağa dəvət olunmadı, çünki ölkənin o vaxtkı populist baş naziri Vladimir Mechiar ölkənin demokratiya və media azadlığı dəyərlərinə zərbə vururdu. Slovak xalqı bu problemi həll etdi və daha Mechiar hökumətini seçmədi. Mən Gürcüstan hökumətini Vladimir Mechiarın səhvlərini təkrarlamamağa çağırıram", - deyə Kubilius bildirib. Digər bir deputat Marina Kalyerand isə həm hakim partiyanı, həm də müxalifətə müraciət edib: "Mən iqtidar və müxalifətdən olan gürcü siyasətçilərini bugünkü müzakirəni son xəbərdarlıq kimi qəbul etməyə çağırıram. Partiya maraqlarınızı bir kənara qoyun, bir-birinizi günahlandırmaqdan əl çəkin və demokratik islahatlar üzərində birgə fəaliyyətə başlayın. Fürsət pəncərəsi hələ də açıqdır və gürcü xalqının sizdən gözlədiyi budur", - deyə Kalyerand qeyd edib. Avropa Parlamentinin digər bir deputatı Anna Fotiga isə çıxışı zamanı Mixeil Saakaşvilinin həbsdə olduğuna diqqət çəkib: "Avropa Birliyinə inteqrasiya gürcü xalqının böyük dəstəyinə malikdir. Bu dəstəyin əldə olunmasında Gürcüstanın bir çox hökumətləri və siyasi elitanın üzvləri, xüsusən də hazırda həbsdə olan Gürcüstanın üçüncü prezidenti Mixeil Saakaşvilinin xüsusi əməyi olub və bu xatırlanmalıdır", - deyə Fotiga bildirib. Qeyd edək ki, Gürcüstanla bağlı təqdim olunan qətnamə qəbulu üzrə səsvermə iyunun 9-da baş tutacaq.

www.24news.ge

Avropa Parlamenti Gürcüstan hökumətini bir sıra məsələlərlə bağlı ciddi tənqid edib

Digər xəbərlər