Tbilisidə “Gələcəyə aparan yol” adlı sərgi açılıb (VİDEO)

Mayın 10-da Tbilisidə Gürcüstanın Təsviri İncəsənət Muzeyində Azərbaycan xalqının ümummilli lideri Heydər Əliyevin anadan olmasının 99-cu ildönümünə həsr olunmuş “Gələcəyə aparan yol” adlı fotosərgi açılıb. 24News.ge xəbər verir ki, sərgi Azərbaycanın Gürcüstandakı səfirliyinin təşəbbüsü, Gürcüstan Təsviri İncəsənət Muzeyi və M.F.Axundzadə adına Azərbaycan Mədəniyyəti Muzeyinin birgə təşkilatçılığı ilə reallaşıb. Sərgidə Heydər Əliyevin Gürcüstana, eləcə də Eduard Şevardnadzenin Azərbaycana səfərlərinə, beynəlxalq tədbirlərdə, enerji layihələrinin təməlqoyma və açılış mərasimlərində iştirakına dair 50-yə yaxın foto nümayiş etdirilir. Bundan başqa, sərgidə Eduard Şevardnadze Fondunda saxlanılan və Heydər Əliyev tərəfindən gürcü liderinə hədiyyə olunan şəxsi əşyalar da sərgilənir. Bu əşyalar E.Şevardnadzenin ailə üzvləri tərəfindən təqdim olunub. Sərginin açılış mərasimində Gürcüstanın sabiq prezidenti Eduard Şevardnadzenin nəvəsi Sofiko Şevardnadze Azərbaycan ilə Gürcüstan arasındakı dostluq əlaqələrindən danışıb. Tbilisidə babasının yaxın dostu Heydər Əliyevin xatirəsinə həsr olunan sərginin açılışını ölkələrimiz arasındakı münasibətlərin bariz nümunəsi adlandırıb. Azərbaycanın Gürcüstandakı səfiri Faiq Quliyev çıxışında ölkələrimiz arasındakı əlaqələrin inkişaf perspektivləri barədə məlumat verib. Ölkələrimiz arasında əlaqələrin inkişafında və bugünkü strateji tərəfdaşlıq səviyyəsinə yüksəlməsində Azərbaycan xalqının ümummilli lideri Heydər Əliyevin və Gürcüstanın sabiq prezidenti Eduard Şeverdnadzenin xidmətlərini xüsusi qeyd edib. Tədbirdə Gürcüstan xarici işlər nazirinin müavini Aleksander Xvtisiaşvili, Gürcüstanın sabiq dövlət naziri və Prezident Administrasiyasının rəhbəri Vaja Lortkipanidze də çıxış ediblər. Daha sonra Heydər Əliyev və Eduard Şeverdnadzenin həyat və fəaliyyətindən bəhs edən sənədli film nümayiş etdirilib, tədbir iştirakçıları sərgidə nümayiş olunan fotolara baxıblar. Sərginin açılış mərasiminə Azərbaycanın Batumidəki baş konsulu Pərviz İsmayılzadə, SOCAR-ın Gürcüstan nümayəndəliyinin rəhbəri Mahir Məmmədov, AZEBİ-nin idarə heyətinin sədri Nəriman Qurbanov, Gürcüstan Xarici İşlər Nazirliyinin, parlamentinin, meriyasının rəsmi şəxsləri, Tbilisidəki diplomatik korpusun rəhbərləri və əməkdaşları, azərbaycanlı iş adamları, ziyalılar qatılıblar. Qeyd edək ki, sərgi mayın 15-dək davam edəcək.

www.24news.ge

Tbilisidə “Gələcəyə aparan yol” adlı sərgi açılıb (VİDEO)

Digər xəbərlər