Haqqımızda Reklam
23 
Fev
2021
16:37
23
3
559

Marneulidə Xocalı faciəsinin 29-cu ildönümü yad edilib (FOTO)

Marneuli şəhərində Xocalı faciəsinin 29-cu ildönümünə həsr olunan "Xocalı soyqırımından Şuşanın azadlığınadək" adlı mərasim keçirilib. 24News.ge xəbər verir ki, Gürcüstan Azərbaycanlılarının İnteqrasiya Mərkəzində təşkil olunan tədbir soyqırım qurbanlarının xatirəsinin bir dəqiqəlik sükutla yad edilməsi və müqəddəs Qurani Kərimdən ayələrin zikr olunması ilə başlayıb. Azərbaycanın Gürcüstandakı səfirliyinin müşaviri Eldar Bayramov çıxış edərək Xocalı qətliamının tarixindən danışıb və faciəni insanlığa qarşı misli görünməmiş cinayət adlandırıb. O, Ermənistanın keçmiş prezidenti Serj Sarqsyanın Xocalı hadisələri ilə bağlı sözlərini xatırladaraq qeyd edib ki, bu etiraf beynəlxalq ədalət məhkəməsi üçün dəlil kimi qiymətləndirilir. Diplomat Xocalı soyqırımı həqiqətlərinin dünya ictimaiyyətinə çatdırılması istiqamətində xarici ölkələrdə aparılan kampaniyalardan danışıb. O, 14 ölkənin parlamentində faciə ilə bağlı müvafiq sənəd və qərarların qəbul olunduğunu bildirib: "Azərbaycan 44 günlük Vətən müharibəsində beynəlxalq ədalətin zəfərinə nail oldu. Müharibə dövründə Gürcüstandakı soydaşlarımızdan misilsiz dəstək gördük. Bu dəstəklə soydaşlarımız Azərbaycana böyük sevgi və bağlılıqlarını bir daha sübut etdilər. Buna görə azərbaycanlı icmasına səfirlik adından təşəkkürümüzü bildiririk". O, həmçinin Gürcüstanın azərbaycanlı icmasına "Xocalıya ədalət" kampaniyasına qoşulduqlarına görə minnətdarlıq edib. Daha sonra çıxış edən GAİM-in icraçı direktoru Rafiq Hümbətov deyib ki, Xocalı faciəsinin ağrı-acısı heç zaman unudulmayacaq: "Gün gələcək faciə qurbanlarının xatirəsi Xocalıda anılacaq. Bu cür dəhşətli cinayətlərin təkrarlanmaması üçün bölgədə dayanıqlı sülhə nail olunmalıdır". Mərasimdə Gürcüstan parlamentinin keçmiş deputatları, ictimai xadim Mahir Dərziyev və Ruslah Hacıyev də çıxış edərək bölgədə davamlı sülhün önəmindən söz açıblar. Onlar həmçinin Gürcüstan-Azərbaycan tərəfdaşlığının bütün dünyaya örnək olduğunu qeyd ediblər. Tədbir digər azərbaycanlı ziyalıların çıxışları ilə davam etdirilib.

www.24news.ge