ღარიბაშვილმა ციხიდან კიდევ ერთი სკანდალური წერილი გაავრცელა

საქართველოს ყოფილმა პრემიერ-მინისტრმა ირაკლი ღარიბაშვილმა რუსთავის ციხიდან გავრცელებულ მორიგ წერილში ხელისუფლება მკაცრად გააკრიტიკა. 24News.ge იუწყება, რომ ყოფილი პრემიერ-მინისტრი ირაკლი ღარიბაშვილი აცხადებს, რომ დაკავება პოლიტიკურად მოტივირებულია. მან გავრცელებულ წერილში განაცხადა, რომ მისი დაკავების მთავარი მიზანი იყო მისი პოლიტიკური საქმიანობისთვის ხელის შეშლა, რეპუტაციის შელახვა და მომავალი პოლიტიკური კარიერის განადგურება. ღარიბაშვილმა აღნიშნა, რომ ბიძინა ივანიშვილთან 20 წლიანი ურთიერთობის გამო, დაპირისპირების თავიდან აცილების მიზნით, დათანხმდა „პოლიტიკურ მსხვერპლად“ ქცევას და ციხეში აღმოჩნდა. მისი თქმით, ამით ცდილობდა როგორც გუნდის, ისე ქვეყნის დაცვას, თუმცა საბოლოოდ „მესამედ მოატყუეს“. ყოფილი პრემიერი აცხადებს, რომ თავდაპირველად მას დაჰპირდნენ, რომ არ დააპატიმრებდნენ, საკითხს პირობითი სასჯელითა და ჯარიმით მოაგვარებდნენ, თუმცა მოგვიანებით ეს პირობები შეიცვალა და 5 წლით თავისუფლების აღკვეთის გადაწყვეტილება მიიღეს. ღარიბაშვილმა ხაზი გაუსვა, რომ მან უკვე აღიარა დანაშაული, აანაზღაურა მიყენებული ზიანი და ჯარიმაც გადაიხადა, მიუხედავად ამისა, მისი პატიმრობაში დატოვება საზოგადოებისთვის გაუგებარი აღმოჩნდა. მისი თქმით, ხელისუფლებამ მისი დაკავებით მოსალოდნელ ეფექტს ვერ მიაღწია და ამიტომ მოგვიანებით ახალი ბრალდებების წაყენებას შეეცადა. ღარიბაშვილი აცხადებს, რომ მიზანი მისი სახელის სრული დისკრედიტაცია და პოლიტიკაში დაბრუნების შესაძლებლობის აღმოფხვრაა. ყოფილმა პრემიერმა წერილში მმართველი გუნდი მკაცრად გააკრიტიკა და განაცხადა, რომ ისინი „ნაციონალური მოძრაობის“ მეთოდებს იყენებენ და ქვეყანას ქაოსისკენ მიჰყავთ. მან ასევე ხელისუფლება სახელმწიფო ინსტიტუტების დასუსტებასა და ქვეყნის იმიჯისთვის ზიანის მიყენებაში დაადანაშაულა. ღარიბაშვილმა ასევე აღნიშნა, რომ ბოლო პერიოდში მის წინააღმდეგ წარმოებული კამპანია შიშსა და ზეწოლას ეფუძნება და ამას „ბინძური პროპაგანდა“ უწოდა. ყოფილმა პრემიერმა საბოლოოდ ხელისუფლებას მიმართა და მათ სიფრთხილისკენ მოუწოდა.

www.24news.ge

ღარიბაშვილმა ციხიდან კიდევ ერთი სკანდალური წერილი გაავრცელა

სხვა სიახლეები