Gürcüstan və Özbəkistan arasında yük daşımaları üzrə rəqəmsal icazə sistemi işə salınıb

Gürcüstan İqtisadiyyat və Davamlı İnkişaf Nazirliyinin Yerüstü Nəqliyyat Agentliyi Gürcüstan və Özbəkistan arasında beynəlxalq avtomobil yükdaşımaları üçün rəqəmsal icazə sənədlərinin verilməsi və mübadiləsi mexanizmini tətbiq edib. 24News.ge xəbər verir ki, məlumata görə, yeni sistem daşıyıcılara icazə sənədlərindən tam elektron formatda istifadə etməyə imkan verir. Rəqəmsal mexanizm icazələrin sürətli və təhlükəsiz şəkildə mübadiləsini, qeydiyyatını və nəzarətini təmin edir. Bununla yanaşı, inzibati və texniki maneələri azaltmaqla yükdaşıma prosesinin səmərəliliyini artırır. Agentliyin direktoru Bakur Mikadzenin sözlərinə görə, rəqəmsal icazə sisteminin tətbiqi beynəlxalq avtomobil yükdaşımalarının idarə edilməsində müasir standartların formalaşdırılması istiqamətində mühüm addımdır. Onun sözlərinə görə, Azərbaycan, Türkiyə və Qazaxıstanla analoji sistemlərin uğurla tətbiq edilməsindən sonra Özbəkistanla rəqəmsal formata keçid bu prosesin məntiqi davamıdır. Mikadze bildirib ki, bu əməkdaşlıq Orta Dəhlizin artan rolu fonunda xüsusi əhəmiyyət daşıyır. Sürətli, təhlükəsiz və rəqəmsal icazə prosedurlarının tətbiqi dəhlizin rəqabət qabiliyyətinin artırılmasına, yüklərin maneəsiz daşınmasına və Gürcüstanın Avropa ilə Asiyanı birləşdirən mühüm tranzit və logistika halqası kimi mövqeyinin möhkəmləndirilməsinə xidmət edir. Qeyd olunub ki, agentlik digər tərəfdaş ölkələrlə də rəqəmsal icazə sisteminə mərhələli keçidi planlaşdırır. Bu prosesin avtomobil nəqliyyatı əlaqələrinin gücləndirilməsinə, ticarət və logistika prosedurlarının sadələşdirilməsinə, eləcə də Gürcüstanın regional tranzit və logistika mərkəzi kimi rolunun daha da möhkəmləndirilməsinə töhfə verəcəyi bildirilir.

www.24news.ge

Gürcüstan və Özbəkistan arasında yük daşımaları üzrə rəqəmsal icazə sistemi işə salınıb

Digər xəbərlər