Mağazaları qarət edən 5 yeniyetmə saxlanılıb (VİDEO)

Tbilisi Polis Departamentinin Yetkinlik Yaşına Çatmayanların İşləri üzrə Baş İdarəsinin əməkdaşları müxtəlif vaxtlarda qrup halında törədilən oğurluq və qarət ittihamı ilə 5 yeniyetməni saxlayıb. 24News.ge xəbər verir ki, bu barədə Daxili İşlər Nazirliyi məlumat yayıb. Məlumata görə, saxlanılanlardan 2-si əvvəllər məhkum olunub və hazırda şərti cəza altındadır. İstintaq tədbirləri nəticəsində müəyyən edilib ki, yeniyetmələr əvvəlcədən razılaşaraq qrup halında Tbilisidə yerləşən aptek və ərzaq mağazaları şəbəkələrindən müxtəlif dəyərdə məhsulları oğurlayaraq hadisə yerindən qaçıblar. Həmçinin müəyyən edilib ki, saxlanılanlardan biri vətəndaşa məxsus motosikleti qanunsuz şəkildə ələ keçirib. İstintaq çərçivəsində ticarət obyektlərində quraşdırılmış müşahidə kameralarının görüntüləri əldə olunub. Görüntülərin şübhəli şəxslərin törətdiyi əməlləri təsdiqlədiyi bildirilir. DİN-in məlumatına görə, yeniyetmələrin törətdiyi cinayətlər nəticəsində müxtəlif ticarət obyektlərinə 30 min laridən çox maddi ziyan dəyib. Polis həyata keçirdiyi əməliyyat və istintaq tədbirləri nəticəsində 5 yeniyetmənin hamısını məhkəmə qərarı əsasında təqsirləndirilən şəxs qismində saxlayıb. Faktla bağlı araşdırma Cinayət Məcəlləsinin 177-ci və 178-ci maddələri ilə aparılır. Sözügedən maddələr 8 ilədək azadlıqdan məhrumetmə cəzasını nəzərdə tutur.

www.24news.ge

Mağazaları qarət edən 5 yeniyetmə saxlanılıb (VİDEO)

Digər xəbərlər