İmamcümə vətəndaşlara müraciətində "Tasua" mərasiminin bu ilki şüarı barədə açıqlama verib

İyunun 24-də Marneulidə keçiriləcək “Tasua” mərasimi ilə bağlı “Gürcüstan Əhli-Beyt (ə) Cəmiyyəti”nin sədri, İmamcümə Hacı Rasim Məmmədov açıqlama verib. 24News.ge xəbər verir ki, açıqlamada din xadimi mərasimin əsas şüarı haqqında məlumat verib. İmamcümə bildirib ki, Hz İmam Zaman (ə) zühur edəndə onun səsləndirəcəyi şüarlardan biri belə olacaq: "Mən susuz şəhid edilmiş Hüseynin oğluyam", yəni özünü İmam Hüseynlə əlaqələndirəcək. Elə bu səbəbdən də builki Tasua mərasiminin şüarı belə müəyyən edilib: "Bütün din və inancların gözlədiyi “xilaskar”ın zühuru Kərbəla qiyamının davamıdır". İmamcümə əlavə edib ki, Kərbəla şəhidləri İslamın “yaxşılığa dəvət və pislikdən çəkindirmə” ideyasını bütün ümmət və bəşəriyyət üçün örnəyə çevirmişlər. İmam Hüseynin (ə) Mədinədən Kərbəlaya doğru hərəkəti zamanı səsləndirdiyi şüarlar ümumbəşəri xarakter daşıyır. Buna görə də demək olar ki, Kərbəla dəyərləri bütün səmavi dinlərin və sağlam təfəkkürlü insanların ortaq dəyərləridir. Hacı Rasim Məmmədov, həmçinin "Tasua"nın hidayət çırağı və nicat gəmisi kimi simvolik mənasını vurğulayaraq bu mərasimlərin maneəsiz və təhlükəsiz şəkildə keçirilməsinə şərait yaratdığı üçün Gürcüstan dövlətinə təşəkkürünü bildirib. İmamcümənin sözlərinə görə, Tasua mərasimi ilə bağlı yerli hökumət nümayəndələrinə məlumat verilib və onlar da mərasimin problemsiz keçirilməsi üçün bütün lazımi şəraitin yaradılacağını bildiriblər. Din xadimi qeyd edib ki, Gürcüstanda keçirilən “Tasua” yürüşü bu gün bir çox mütərəqqi ölkələrdə nümunəyə çevrilmiş və ənənəvi olaraq davam etdirilməkdədir. Məlumat üçün bildirək ki, 24 iyun tarixində saat 10:00-da müsəlmanlar Marneulidə yerləşən Gürcüstan Əhli-Beyt Cəmiyyətinin binası qarşısında toplaşacaq, saat 11:00-da isə HZ. İmam Əli (ə) məscidinə doğru yürüşə başlayacaqlar.

www.24news.ge

İmamcümə vətəndaşlara müraciətində "Tasua" mərasiminin bu ilki şüarı barədə açıqlama verib

Digər xəbərlər