Gürcüstan və Türkiyə parlament sədrləri İstanbulda strateji tərəfdaşlığı müzakirə ediblər (FOTO)

Gürcüstan Parlamentinin sədri Şalva Papuaşvili Türkiyə Böyük Millət Məclisinin sədri Numan Kurtulmuş ilə İstanbulda görüş keçirib. 24News.ge xəbər verir ki, bu barədə məlumatı Şalva Papuaşvili sosial şəbəkə hesabında paylaşıb. Məlumata görə, görüş zamanı Papuaşvili son günlər Türkiyə məktəblərində baş vermiş və insan tələfatı ilə nəticələnmiş faciəli hadisələrlə bağlı türkiyəli həmkarına başsağlığı verib. O, həmçinin Parlamentlərarası İttifaqın (IPU) Baş Assambleyasının 152-ci iclasının uğurla təşkil olunmasına və göstərilən qonaqpərvərliyə görə təşəkkürünü bildirib. Tərəflər Gürcüstan və Türkiyə arasında uzun illərə söykənən səmərəli əməkdaşlıq və xalqlar arasında dostluq münasibətlərini vurğulayıblar. Görüşdə parlamentlərarası əlaqələrin daha da inkişaf etdirilməsi, regional parlament formatlarının fəallaşdırılması və üçtərəfli əməkdaşlıq məsələləri müzakirə olunub. Bildirilib ki, Gürcüstan yaxın vaxtlarda Gürcüstan–Türkiyə–Azərbaycan parlamentlərinin xarici əlaqələr komitələrinin üçtərəfli görüşünə ev sahibliyi edəcək. Bununla yanaşı, tərəflər regionda və dünyada baş verən son proseslər ətrafında fikir mübadiləsi aparıblar. Görüşdə sülh və sabitliyin təmin olunmasının əhəmiyyəti xüsusi olaraq qeyd edilib. Numan Kurtulmuş Gürcüstanın regional sülhün möhkəmləndirilməsinə verdiyi töhfəni yüksək qiymətləndirib. Qeyd edək ki, görüş Türkiyənin İstanbul şəhərində keçirilən Parlamentlərarası İttifaqın (IPU) 152-ci Baş Assambleyası çərçivəsində baş tutub.

www.24news.ge

Gürcüstan və Türkiyə parlament sədrləri İstanbulda strateji tərəfdaşlığı müzakirə ediblər (FOTO)

Digər xəbərlər