გარდაბანში ქმრის მიერ ცოლის მკვლელობის საქმეზე დამატებითი დეტალები ხდება ცნობილი

გარდაბანში, ქმრის მიერ მეუღლის მკვლელობის შესახებ დამატებითი დეტალები ხდება ცნობილი. როგორც მოკლული ქალის ახლობელი აღნიშნავს, გარდაცვლილი ხშირად იყო მეუღლის მხრიდან ძალადობის მსხვერპლი, რის გამოც ბრალდებულის შემაკავებელი ორდერიც ჰქონდა გამოწერილი. მისივე თქმით, ინფორმაცია იმის თაობაზე, რომ მკვლელობის დღეს რაღაცას ყიდულობდნენ ერთად, არასწორია. „მარის ხშირად ვხვდებოდი, პირველი შვილი რომ შეეძინა, მეუბნებოდა, რომ კარგად იყვნენ და ბედნიერი ჩანდა. მაგრამ მერე შეიცვალა ვითარება. ეს ქმარი ეჭვიანი იყო. ძალადობდა ცოლზე და ხშირად იყო ძალადობის მსხვერპლი ეს გოგო. ბევრჯერ მინახავს დალურჯებული. ბევრჯერ გაქცეულა სახლიდან, იძახებდა ტაქსის და გარბოდა ბებიასთან წალკაში. მერე ისევ რიგდებოდნენ. ბევრჯერ აქვს მიმართული პოლიციისთვის, საქმის კურსში იყო პოლიცია, მაგრამ ეს შემაკავებელი ორდერი არაფერს ცვლიდა. როგორც ვიცი, ქმარს ფსიქიკური პრობლემებიც ჰქონდა. სულ ქუჩაში, ბირჟაზე იდგა. ძალიან კარგი მშობლები და-ძმა ჰყავს ამ ბიჭს, თვითონ არის მოძალადე და უვარგისი. ბევრჯერ გაატანინეს საჩივარი გარდაბნის პოლიციიდან ამ გოგოს. მარის გარეთაც არ უშვებდა, ბოლო დროს იშვიათად ვხედავდი ეზოში. ახლა რომ ამბობენ მეზობელ წლები ძალადობაო, რატომ არ რეაგირებდნენ მანამდე? ყველამ ხომ იცოდა ეს ამბავი. ცოტა ხნის წინ შევხვდი მის ქმარს და თქვა, მარი აპირებს გერმანიაში წასვლას და თუ წავიდა ჩემი ცოლი, უკან აღარ დაბრუნდებაო. ბოლოს მარი დედამისთან რომ წავიდა, ბოლოს გაშორებულები იყვნენ. არ ვიცი რატომ დაბრუნდა მერე. ინფორმაცია, რომ მკვლელობის დღეს რაღაცას ყიდულობდნენ ერთად არასწორია. მაღაზიაში შეხვდა გუშინ ქმარი და შერიგებას სთხოვა და მარი წინააღმდეგი იყო. ეს გახდა გუშინ ჩხუბის მიზეზი. გაიყვანა საწყობში, იქვე უკან და მიაყენა გოგოს 17 ჭრილობა. მერე ჩაბარდა პოლიციას ეს მკვლელი. ხალხის თვალწინ მოხდა ჩხუბი, რატომ არ მიეშველა არავინ არ ვიცი. ყველას ეშინოდა მისი, რადგან ფსიქიკური პრობლემები ჰქონდა და არ იყო ადეკვატური. სულ დალურჯებული დადიოდა ეს გოგო და ეს იცოდა ყველამ“, - აღნიშნავს Ambebi.ge-სთან გარდაბანში მოკლული ქალის ახლობელი. ცნობისთვის, შინაგან საქმეთა სამინისტრომ დააკავა პირი, რომელმაც, გამოძიების ინფორმაციით, გარდაბანში მეუღლეს ცივი იარაღის გამოყენებით მრავლობითი ჭრილობა მიაყენა. უწყების ცნობით, ბრალდებული პოლიციაში თავად გამოცხადდა და ჩადენილი დანაშაული აღიარა. დანაშაულის ჩადენის იარაღი - დანა ნივთმტკიცებადაა ამოღებული.

www.24news.ge

გარდაბანში ქმრის მიერ ცოლის მკვლელობის საქმეზე დამატებითი დეტალები ხდება ცნობილი

სხვა სიახლეები