Qardabanidə tarixi Marağa məscidi yenidənqurmadan sonra istifadəyə verilib (FOTO-VİDEO)

Qardabani şəhərində yerləşən Marağa məscidi əsaslı yenidənqurma işlərindən sonra istifadəyə verilib. 24News.ge xəbər verir ki, məscidin açılış mərasimində Bütün Gürcüstan Müsəlmanları İdarəsinin Şeyxi Hacı Faiq Nəbiyev, Gürcüstanın Şərqi müftisi Etibar Eminov, Azərbaycan səfirliyinin məsul katibi Cavid Məhərrəmov, İran səfirliyinin Dini İşlər üzrə müşaviri Əli Qurbani, Türkiyə səfirliyinin Dini İşlər üzrə müşaviri Mahmud Göl, Qardabani şəhərinin meri David Karqareteli, Qardabani ruhanilər şurasının rəhbəri Hacı Ramin İgidov, şəhər sakinləri, rəsmi şəxslər, ziyalılar və din xadimləri iştirak ediblər. Bildirilib ki, Marağa məscidi bölgənin dini və mədəni həyatında mühüm yer tutur. Məscid Gürcüstanda yaşayan azərbaycanlı icmasının əsas dini mərkəzlərindən biri olmaqla yerli əhali tərəfindən fəal şəkildə istifadə olunur. Qeyd olunub ki, məscidin tarixi 1825-ci ilə gedib çıxır. Bu fakt Marağa məscidini Gürcüstandakı ən qədim məscidlərdən birinə çevirir. XIX əsrin əvvəllərində inşa olunan məscid binası sovet hakimiyyəti illərində məktəb və qənnadi fabriki kimi istifadə edilib. 2011-ci ildən burada aparılan təmir-bərpa işlərindən sonra Marağa məscidi yenidən dindarların ixtiyarına verilib. Tikilinin üslubu klassik İslam memarlığını əks etdirir və bölgənin dini-mədəni irsinin qorunmasında mühüm rol oynayır. Məscid Qardabani şəhərinin mərkəzində, 9 Aprel küçəsində yerləşir. Burada cümə və bayram namazları qılınır, dini mərasimlər və maarifləndirici tədbirlər keçirilir. Marağa məscidi, eyni zamanda, yerli icma üçün sosial və mədəni bir mərkəz funksiyasını da yerinə yetirir. Tədbirdə Marağa məscidinin yenidən istifadəyə verilməsi tolerantlıq və birgəyaşayışın bariz nümunəsi kimi qiymətləndirilib. Məscid xeyriyyəçi Hacı Fərhad Əliyevin dəstəyi ilə bərpa olunub. Təbirdə Gürcüstandakı məscidlərin ümumi vəziyyəti barədə ətraflı məlumat verilib. Bildirilib ki, bu gün Gürcüstanda 400-ə yaxın məscid var və onlardan 40-a yaxınının yaşı bir əsrdən çoxdur. Qeyd edək ki, sonra Qardabanidə Hz. İmam Məhdinin (ə.f) təvəllüdü münasibətilə Kosalı şadlıq sarayında bayram tədbiri keçirilib.

www.24news.ge

Qardabanidə tarixi Marağa məscidi yenidənqurmadan sonra istifadəyə verilib (FOTO-VİDEO)

Digər xəbərlər