Bir qrup Gürcüstan ruhaniləri Ayətullah Əli Xameneiyə qarşı səslənən təhdidləri pisləyiblər

Gürcüstanın bir qrup şiə ruhanisi İranın ali dini lideri, Ayətullah üzma seyyid Əli Xameneinin dünyadakı şər və hegemon qüvvələr tərəfindən terror, sui-qəsd və ölümlə təhdid olunmasını qətiyyətlə pisləyiblər. 24News.ge xəbər verir ki, bu barədə din xadimləri sosial media hesablarında bəyanat paylaşıblar. Ruhanilər bildirib ki, bu cür təhdidlər yalnız bir şəxsi deyil, bütövlükdə İslam ümmətinin izzətinə, müqavimət ruhuna, ilahi dəyərlərə və məzlum xalqların haqq səsinə qarşı yönəlmiş təhlükəli hücumdur. Bəyanatda deyilir: Biz bir qrup Gürcüstan şiə ruhanisi olaraq ali dini rəhbər və böyük İslam müctəhidi həzrət Ayətullah üzma Xameneinin dünyanın şər və hegemon qüvvələri tərəfindən terror, sui‑qəsd və ölümlə təhdid olunmasını qətiyyətlə pisləyir, bu cinayətkar niyyətləri açıq şəkildə qınayır və ali dini rəhbərə olan tam və sarsılmaz dəstəyimizi bəyan edirik. Bu cür təhdidlər yalnız bir şəxsə qarşı deyil, bütövlükdə İslam ümmətinin izzətinə, müqavimət ruhuna, ilahi dəyərlərə və məzlum xalqların haqq səsinə qarşı yönəlmiş planlı və son dərəcə təhlükəli hücumdur. Həzrət Ayətullah üzma Xamenei bu gün İslam dünyasında ədalətin, istiqlaliyyətin, Qurani-Kərim və Əhli-Beyt (ə) yolunun, həmçinin zalıma qarşı qiyam mədəniyyətinin rəmzidir. Onun ABŞ və sionist İsrail başda olmaqla istismarçı və təcavüzkar güclərin siyasətlərinə qarşı açıq, prinsipial və qorxmaz mövqeyi, xüsusilə məzlum Fələstin xalqının və Qəzza müsəlmanlarının müdafiəsində nümayiş etdirdiyi qətiyyət haqq ilə batilin cəbhəsini bütün aydınlığı ilə üzə çıxarmışdır. Biz inanırıq ki, bu təhdidlər zalım qüvvələrin siyasi və mənəvi iflasının, eləcə də müqavimət cəbhəsi qarşısında yaşadıqları acizliyin açıq etirafıdır. Tarix dəfələrlə sübut etmişdir ki, ilahi yolda olan rəhbərləri təhdid, zorakılıq və terror dili ilə qorxutmaq mümkün deyil. Allahın vədi haqdır: “Onlar hiylə qururlar, lakin Allah ən yaxşı tədbir görəndir.” Bu səbəbdən biz bütün müsəlmanları, dini alimləri, ruhaniləri və azad vicdanlı insanları bu həssas və məsuliyyətli məqamda susqun qalmamağa, İslam ümmətinin ali mənafeləri naminə birlik, həmrəylik və qəti mövqe nümayiş etdirməyə çağırırıq. Biz Gürcüstan ruhaniləri olaraq bəyan edirik ki, ali dini rəhbərin yanında dayanmaq təkcə siyasi deyil, eyni zamanda dini, əxlaqi və vicdani bir vəzifədir. Allah-taaladan diləyirik ki, həzrət Ayətullah üzma Xameneini Öz ilahi himayəsi altında qorusun, İslam ümmətinə birlik və bəsirət nəsib etsin, məzlumların ahını zalımların öz başına qaytarsın və haqq cəbhəsini qələbəyə çatdırsın".

www.24news.ge

Bir qrup Gürcüstan ruhaniləri Ayətullah Əli Xameneiyə qarşı səslənən təhdidləri pisləyiblər

Digər xəbərlər